სემეკმა 4 თბოელექტროსადგურს ელექტროენერგიის წარმოების ტარიფები შეუმცირა

პოლიტიკა - 14:36, 22 Sep, 2017

862

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ 4 თბოელექტროსადგურს 2017 წლის ელექტროენერგიის წარმოების ტარიფები შეუმცირა. ცვლილების მთავარ მიზეზად ვალუტის კურსი დასახელდა. სემეკის თავმჯდომარის ირინა მილორავას თქმით აღნიშნული სადგურებისთვის ტარიფების დადგენა, 2016 წლის დეკემბერში, ვალუტის კურსის 2,78 ლარის გათვალისწინებით მოხდა, შესაბამისად დღეს სხვა კურსის არსებობის გამო განხორციელდა კორექტირება.

კორექტირების მოთხოვნით ჩვენ 4-ვე თბოელექტროსადგურმა მოგვმართა აგვისტოში და დღეს შესაბამისად, კომისიამ მიიღო გადაწყვეტილება. სემეკის გადაწყვეტილებით ოთხივე თბოელექტროსადგურისთვის ტარიფები შემცირებულია - მაქსიმალური შემცირება 4 თეთრია, ხოლო მინიმალური ერთ თეთრამდე. შესაბამისად, ამ შემცირებული ტარიფით თბოელექტროსადგურები ელექტროენერგიას მიაწვდიან ელექტროსისტემას წლის ბოლომდე", - განაცხადა მილორავამ.

ჟურნალისტების კითხვაზე, იმოქმედებს თუ არა დღევანდელი გადაწყვეტილება ელექტროენერგიის სამომხმარებლო ტარიფზე, მილორავამ უპასუხა, რომ სამომხმარებლო ტარიფზე ყველა კორექტირება მოქმედებს.

,,როდის მოხდება ეს კორექტირების ასახვა სამომხმარებლო ტარიფზე, ეს მეთოდოლოგიით ძალიან ცხადადაა განსაზღვრული, შესაბამისად, ჩვენ როდესაც დავადგენთ სამომხმარებლო ტარიფებს, აუცილებლად გავაკეთებთ აქცენტებს, მოქმედებს თუ არა კორექტირებული ნაწილი იმ კონკრეტულ შემთხვევაში სამომხმარებლო ტარიფზე." - განაცხადა ირინა მილორავამ.