აუდიტის სამსახურის ახალი ხელმძღვანელი დღეს დაკისრებული მოვალეობის შესრულებას შეუდგა. ირაკლი მექვაბიშვილმა ჟურნალისტებთან საუბრისას განაცხადა, რომ მისი საქმიანობის აქცენტი იქნება პრევენციული, ვიდრე სადამსჯელო:

"ჩვენი საქმიანობა იქნება დაფუძნებული 4 ძირითად ღირებულებაზე, ეს არის: პროფესიონალიზმი, ობიექტურობა, დამოუკიდებლობა და საჯაროობა. გაძლიერდება აუდიტის სამსახურის ტექნოლოგიური ბაზა. ჩვენი საქმიანობის აქცენტი მინდა იყოს უფრო პრევენციული, ვიდრე სადამსჯელო. თუმცა, თუ რაიმე გადახვევა იქნება კანონთან, ამას მყისიერი რეაგირება მოჰყვება. ჩვენი მუშაობა დონორ და პარტნიორ ქვეყნებთან რამდენადაც შესაძლებელი იქნება გაძლიერდება. განსაკუთრებულად აქცენტს გავაკეთებთ ეფექტიანობის ამაღლებაზე, ვინაიდან მნიშვნელოვანია ყველამ ვიცოდეთ როგორ ნაწილდება გადასახადების გადამხდელებისგან მოზიდული თანხები“, - განაცხადა მექვაბიშვილმა.

მექვაბიშვილი ასევე აცხადებს, რომ უმაღლეს საკანონმდებლო ორგანოსთან თანამშრომლობის ეფექტიანობა გაიზრდება:

"ჩვენი მუშაობა გაცილებით ეფექტური იქნება პარლამენტთან, ერთობლივად შევიმუშავებთ ისეთ მექანიზმებს, რომ ჩვენი დასკვნების საფუძველზე გაცემული რეკომენდაციების შესრულების კოეფიციენტი რამდენადაც შესაძლებელი იქნება ამაღლდეს",- განაცხადა მექვაბიშვილმა.