ყოფილი ევროპარლამენტარი "სამხრეთ ოსეთის“ ე.წ. პრეზიდენტის ევროპარლამენტში მიწვევას გეგმავს - რას აცხადებენ თბილისსა და ევროპარლამენტში

პოლიტიკა - 15:27, 20 Sep, 2017

1594

ყოფილი ევროპარლმენტარი, იტალიელი ჟურნალისტი ჯულიეტო კიეზა, 19 სექტემბერს ოკუპირებული ცხინვალის რეგიონში იმყოფებოდა. კიეზამ დე ფაქტო ხელისუფლების წარმომადგენლებთან შეხვედრისას ე.წ სამხრეთ ოსეთის დამოუკიდებლობის აღიარებაზე ისაუბრა და აღნიშნა, რომ ევროპის მხრიდან ე.წ სამხრეთ ოსეთის აუღიარებლობის ერთ-ერთი მთავარი მიზეზი ისაა, რომ ევროპას ოსი ხალხის და კონფლიქტის მიზეზების შესახებ ინფორმაცია არ გააჩნია. კიეზას თქმით, ის ე.წ სამხრეთ ოსეთის შესახებ „ჭეშმარიტი ინფორმაციის გავრცელებისას, თავის ჟურნალისტურ მოვალეობას ასრულებს.“

ოკუპირებული ცხინვალის რეგიონის ე.წ პარლამენტის მიერ მიღებული იქნა დადგენილება, სადაც აღნიშნული იქნა, რომ ჯულიეტო კიეზა ევროპარლამენტში სამხერ ოსეთის ინტერესების წარმომადგენელი იქნება.

კიეზამ ასევე განაცხადა, რომ შეეცდება მიიწვიოს სამხრეთ ოსეთის დე ფაქტო პრეზიდენტი ბრიუსლეში, რათა ანატოლი ბიბილოვი გამოვიდეს ევროპარლამენტში და ევროპარლამენტარებს თავად მიაწოდოს ინფორმაცია, თუ რას წარმოადგენს მისი რესპუბლიკა, ისტორია და ხალხი:

„ჩემი მიზნის უახლოეს თვეებში განხორციელება რთული იქნება. თუ გამოვა, ეს იქნება ფუნდამენტური მომენტი და რა თქმა უნდა გამოიწვევს დიდი სკანდალს. არის რამდენიმე დეპუტატი, რომლებიც მზად არიან მხარი დაგვიჭირონ. ევროპარლამენტში ცალკეულ დეპუტატებს აქვთ გარკვეული ღონისძიებების ორგანიზების უფლება, ამიტომ ჩვენ შევკრებთ დეპუტატების ჯგუფს, რომლებიც მიიწვევენ პრეზიდენტს, თუ ეს არ მოხერხდება, მაშინ საგარეო საქმეთა მინისტრს. მე ძალიან მოხარული ვიქნები თუ ამის გაკეთებას შევძლებთ“- განაცხადა კიეზამ. ამასთანავე კიეზამ აღნიშნა, რომ წელს იგეგმება ე.წ სამხრეთ ოსეთიდან კულტურის მოღვაწეების იტალიაში ჩასვლა, ასევე რამდენიმე პოლიტიკური ღონისძიებაც, მათ შორის ე.წ სამხრეთ ოსეთის დე ფაქტო საგარეო საქმეთა მინისტრის ვიზიტი.

აღნიშნულ ფაქტს გამოხმაურება მოჰყვა, როგორც ოფიციალური თბილისის ასევე ევროპარლამენტარების მხრიდანაც.

ევროკავშირი-საქართველოს საპარლამენტო ასოცირების კომიტეტის თანათავმჯდომარე საჯად კარიმი ოკუპირებულ ცხინვალში ყოფილი ევროპარლამენტარის ჯულიეტო კიეზას ჩასვლის ფაქტს გამოეხმაურა და საქართველოს ტერიტორიული მთლიანობასთან დაკავშირებით ევროკავშირის მხარდაჭერა კიდევ ერთხელ დააფიქსირა:

„საქართველოს ტერიტორიული მთლიანობა საკამათო არაა, ჩვენი პოზიცია უცვლელი რჩება, ამ ეტაპზე რაც შემიძლია გითხრათ,ა რის ის, რომ პარლამენტის ფარგლებში აქტივობა მხოლოდ მოქმედ დეპუტატებს შეუძლიათ და არა ყოფილებს, ჩვენ არ შეგვინიშნავს, რომ ასეთი ტიპის ქმედებები დაეგეგმათ მოქმედ წევრებს. ჩვენ ამის შესახებ თბილისში გამართული შეხვედრების დროს შევიტყვეთ. ამ ეტაპზე, ის შემიძლია გითხრათ, რომ ყოფილ ევროპარლამენტარებს უფლებამოსილება აღარ აქვთ და ამიტომ, არანაირი ინფორმაცია ამის შესახებ არ გვაქვს. არ მინდა, უხეში ვიყო, მაგრამ ალბათ, ყოფილები იმიტომაც არიან, რომ ამას იმსახურებენ“, - განაცხადა საჯად კარიმმა.

აღნიშნულ ფაქტს საქართველოს საგარეო საქმეთა სამინისტროც გამოეხმაურა, ჯანელიძის უწყებაში აცხადებენ, რომ რუსეთთან ასოცირებული კერძო პირები ვერ მოახდენენ საერთაშორისო პლატფორმის გამოყენებას თავისი ვიწრო პოლიტიკური ინტერესებისთვის და ასეთი ფორმატებით საოკუპაციო რეჟიმის პროპაგანდა ვერ მოხდება.