გაეროში, დალია გრიბაუსკაიტეს გამოსვლის წინ, რუსეთის დელეგაციამ სხდომათა დარბაზი დატოვა

პოლიტიკა - 11:01, 20 Sep, 2017

2099

ნიუ-იორკში , გაერთიანებული ერების ორგანიზაციიის 72-ე გენერალური ასამბლეა მიმდინარეობს.

ლიტვის პრეზიდენტმა, დალია გრიბაუსკაიტემ საკუთარი გამოსვლა რუსეთის კრიტიკას დაუთმო, მისი გამოსვლის წინ რუსეთის დელეგაციამ დარბაზი დატოვა.

სანამ ლიტვის პრეზიდენტი ტრიბუნაზე ავიდოდა, გაეროში რუსეთის მუდმივი წარმომადგენლის პირველმა მოადგილემ პიოტრ ილიჩევი და რუსეთის დუმის საგარეო ურთიერთობათა კომიტეტის თავმჯდომარე, ლეონიდ სლუცკი ფეხზე წამოდგნენ და დარბაზი დატოვეს.

„ამ სხდომის მიმდინარეობისას, დაახლოებით, 100 ათასი რუსი სამხედრო მონაწილეობს წვრთნებში „ზაპად 2017“ - ბალტიის სახელმწიფოების საზღვართან. კრემლი ამუშავებს მეზობლებზე თავდასხმის გეგმას. დასავლეთზე თავდასხმისთვის ამზადებენ სამხედროებს” - განაცხადა გრიბაუსკაიტემ.

ლიტვის პრეზიდენტმა ასევე განაცხადა, რომ „მიუხედავად რუსეთის მიერ აღებული ვალდებულებისა, დაიცვას საერთაშორისო მშვიდობა, როგორც უსაფრთხოების საბჭოს ერთ-ერთმა წევრმა, მან საქართველოზე თავდასხმით, ყირიმის უკანონო ანექსიითა და აღმოსავლეთ უკრაინაში მიმდინარე კონფლიქტში პირდაპირი მონაწილეობით გაეროს წესდება დაარღვია."