ნიუ იორკში გაეროს 72-ე ასამბლეა მიმდინარეობს. დებატების გახსნისას წევრი ქვეყნების ლიდერების გამოსვლებში საქართველო ერთ-ერთი მთავარი თემა იყო. მათ გამოსვლებში რუსეთის ფედერაციის პირდაპირი კრიტიკაც ისმოდა. საქართველოს ტერიტორიულ მთლიანობას მხარდაჭერა გამოუცხადა თურქეთის პრეზიდენტმა. რეჯეპ ტაიპ ერდოღანის განცხადებით, საქართველოსა და აზერბაიჯანის ტერიტორიული მთლიანობა, სამხრეთ კავკასიაში სტაბილურობისათვის გადამწყვეტი ფაქტორია.

“საქართველოსა და აზერბაიჯანის ტერიტორიული მთლიანობა გადამწყვეტია სამხრეთ კავკასიაში, რეგიონული სტაბილურობისათვის, ჩვენ უნდა გავაძლიეროთ მუშაობა მთიანი ყარაბაღი, აფხაზეთისა და „სამხრეთ ოსეთის“ კონფლიქტების დარეგულირების საკითხზე, არ უნდა დაგვავიწყდეს, რომ ყოველი კრიზისი, რომელსაც დღეს უყურადღებოდ დავტოვებთ, შშესაძლოა ხვალ რეგიონულ ან საერთაშორისო კრიზისად გადაიქცეს“, - განაცხადა ერდოღანმა.