საკონსტიტუციო ცვლილებები - საქართველოს პრეზიდენტსა და ოპოზიციას შორის რეფორმასთან დაკავშირებით შემუშავებული დოკუმენტი ვენეციის კომისიას გადაეგზავნა. აღნიშნული დოკუმენტი უკვე მიიღო „ქართულმა ოცნებამაც“, ამის შესახებ ინფორმაციას პრეზიდენტის ადმინისტრაციაში ადასტურებენ.

პოლიტიკური სპექტრი მთავარი კანონის რეფორმირებასთან დაკავშირებით ხუთ პუნქტს ასახელებს - მათ შორის მაჟორიტარული სისტემის გაუქმება, პრეზიდენტის პირდაპირი არჩევის წესი, უშიშროების საბჭოსა და საარჩევნო ბლოკების შენარჩუნება და ბარიერის დაწევაა.

„ჩვენ გვინდა, რომ ამ სიტუაციაში კიდევ ერთხელ შანსი მივცეთ ყველას. უპირველესყოვლისა საქართველოს, მმართველ ძალას, ჩვენს თავსაც, რომ მივიღოთ თანხმობის დოკუმენტი და არა განხეთქილების დოკუმენტი.

დღეს პოლიტიკური ნების დეფიციტია მთავარი პრობლემა და თუ ასეთი ნება იარსებებს, მერწმუნეთ, არსებობს გზები ამისთვის, რომ ეს დილემა დაიძლიოს. რაც შეეხება ვეტოს, ვეტოზე წინასწარ საუბარი გაუმართლებელია,“-განაცხადა ფიქრია ჩიხრაძემ.

მმართველ გუნდში საქართველოს პრეზიდენტისა და ოპოზიციის შეთანხმებას სერიოზულად არ განიხილავენ. უმრავლესობა საკონსტიტუციო ცვლილებებთან დაკავშირებით, რომელიც ორი მოსმენით უკვე მიღებულია, დადებით დასკვნას ელოდება.