სადეპუტატო იმუნიტეტი შესაძლოა გაუქმდეს - ზეწოლა ოპოზიციაზე თუ პრივილეგიებზე უარის თქმა

პოლიტიკა - 14:38, 18 Sep, 2017

1627

საპარლამენტო უმრავლესობის წევრები სადეპუტატო იმუნიტეტის გაუქმების შესაძლებლობას განიხილავენ . პარლამენტის ჯანდაცვის კომიტეტის თავმჯდომარის აკაკი ზოიძის თქმით, დეპუტატს პრივილეგიები არ უნდა ქონდეს თუმცა უნდა ქონდეს დაცვა, რომ მასზე ზეწოლა არ მოხდეს პოლიტიკური მეთოდებით, ან ძალოვნების მხრიდან:

„დეპუტატს პრივილეგიები არ უნდა ქონდეს, დეპუტატს უნდა ქონდეს სამუშაო პირობები, იმისათვის რომ ემსახუროს ხალხს. რაც შეეხება იმუნიტეტს, საერთაშორისოდ მიღებული პრაქტიკაა, რომ დეპუტატს, მითუმეტეს თუ ის ოპოზიციაშია, უნდა ქონდეს დაცვა, რომ მასზე ზეწოლა არ მოხდეს პოლიტიკური მეთოდებით, ან ძალოვნების მხრიდან. არ ვიცი რამდენად შეიძლება გავყოთ, რომ იმუნიტეტი მხოლოდ ოპოზიციას ქონდეს და არა სახელისუფლებო გუნდს. გუნდში რა თქმა უნდა გვქონდა ამაზე მსჯელობა, მაგრამ რაღაც განსაკუთრებული დღის წესრიგი და ფორმატირებული არ ყოფილა.“- განაცხადა აკაკი ზოიძემ.

უმრავლესობის წევრის გია ვოლსკის თქმით დეპუტატი ჩვეულებრივი მოქალაქისგან განსხვავებული რაღაც პრივილეგიებით არ უნდა სარგებლობდეს:

„მემგონი მოვიდა საქართველოში ის დრო, როდესაც დეპუტატს არ ექნება იმუნიტეტი და არ ისარგებლებს, ჩვეულებრივი მოქალაქისგან განსხვავებული რაღაც პრივილეგიებით.“- განაცხადა გია ვოლსკიმ.

იმუნიტეტის მოხსნის შესაძლებლობას, პოლიტიკური ოპონენტების წინააღმდეგ მიმართულ ნაბიჯად მიიჩნევს საპარლამენტო ოპოზიცია.

„ევროპული საქართველოს“ ლიდერის გიგა ბოკერიას თქმით, სადეპუტატო იმუნიტეტი ოპოზიციას პოლიტიკური დევნისგან იცავს, რომელიც საქართველოში ძალიან გახშირებულია:

„დეპუტატებს უნდა ქონდეთ იმდენი იმუნიტეტი, რომ ისინი პოლიტიკური დევნის მსხვერპლი ვერ გახდნენ, მაგრამ ამავე დროს კორუფციის შემთხვევაში უნდა იყოს შესაძლებელი ამ საქმეების გამოძიება, დღევნდელი ვითარება და რეგულაცია ამ ორივეს საშუალებას იძლევა. მთელი ეს ეს საუბარი, ივანიშვილის მთავრობის პირობებში, რომელიც კორუფციას კი არ ებრძვის, მის კულტივირებას ახდენს, შეიძლება იყოს მიმართული მხოლოდ პოლიტიკური ოპონენტების წინააღმდეგ.“- განაცხადა გიგა ბოკერიამ.

„ევროპული საქართველოს“ კიდევ ერთი წევრი გიორგი ტუღუში ხაზს უსვამს იმას, რომ იმუნიტეტი არ წარმოადგენს აბსოლუტურ დაცვას და გარკვეულ შემთხვევებში მისი მოხსნა შესაძლებელია.

„იმუნიტეტი რა თქმა უნდა არ უნდა იქნას ბოროტად გამოყენებული, არსებობს იმუნიტეტის მოხსნის მექანიზმიც, ეს არ არის აბსოლუტური დაცვა, თუმცა არის გარკვეული ბარიერი, იმისკენ რომ პოლიტიკოს ქონდეს საშუალება შეინარჩუნოს დამოუკიდებლობა და ასევე არ იდევნებოდეს პოლიტიკურად“- განაცხადა გიორგი ტუღუშმა..

კანონმდებლების იმუნიტეტის საკითხს 2 დოკუმენტი არეგულირებს, პარლამენტის წევრის სტატუსის შესახებ საქართველოს კანონი და პარლამენტის რეგლამენტი, დოკუმენტებში აღნიშნულია, რომ დეპუტატის დაპატიმება ან დაკავება შესაძლებელია , მხოლოდ პარლამენტის ნებართვით. დეპუტატის სისხლის სამართლის პასუხისმგებლობაში მიცემა კი მხოლოდ იუსტიციის მინისტრს შეუძლია.