ხვალ, ,,ქრისტიან-დემოკრატიული მოძრაობა“, 3-წლიანი სასამართლო დავის მოგების შემდეგ ყრილობას გამართავს

პოლიტიკა - 16:44, 16 Sep, 2017

1231

ხვალ, 17 სექტემბერს, 14:00 საათზე ვერის ბაღში მდებარე ჭადრაკის სასახლეში, ქრისტიან-დემოკრატიული მოძრაობა ყრილობას გამართავს.

როგორც პარტიის პრესცენტრში აცხადებენ, სამწლიანი სასამართლო დავის მოგების შემდეგ ქდმ უკანონოდ გასვისებულ პარტიას იბრუნებს და შესაბამისად, ყრილობას განახლებული შემადგენლობით მართავს.

,,ამ ბრძოლის მოგებით, ქრისტიან-დემოკრატები გოჩა ჯოჯუს ლიდერობით განაცხადს აკეთებენ, რომ თავიანთ ამომრჩეველს დაუბრუნებენ გაცრუებულ იმედებს, რაც ყოფილი ლიდერების ქმედებამ დააკარგვინა. ეს იქნება განახლებული პარტია, რომელიც აქტიურად ჩაერთვება ქვეყანაში მიმდინარე პოლიტიკურ პროცესებში და განაგრძობს ბრძოლას სახელმწიფოებრივი აღმშენებლობისთვის” - აცხადებენ პარტიაში.

ცნობისთვის, 2013 წელს ქდმ-ს თავმჯდომარე გიორგი თარგამაძე თანამდებობიდან გადადგა, პარტიის პოლიტსაბჭომ ნინო ბურჯანაძის პარტიასთან გაერთიანება გადაწყვიტა. გოჩა ჯოჯუა კი ქდმ-ს თბილისის ორგანიზაციის თავმჯდომარე გახლდათ და ორგანიზაციის წევრებთან ერთად ამ გადაწყვეტილებას გაემიჯნა, რის გამოც 2014 წლის აგვისტოდან დავა სასამართლოში დაიწყო. პარტიის წევრები ყრილობის იმ გადაწყვეტილებას ასაჩივრებდნენ, რომლის თანახმადაც ქდმ-ს თავმჯდომარედ ნინო ბურჯანაძე გამოცხადდა. ისინი აცხადებდნენ, რომ ყრილობა კანონდარღვევით შედგა, პარტიის წევრების უდიდეს ნაწილს მასში მონაწილეობა არ მიუღიათ და შესაბამისად, მათი განცხადებით, ბურჯანაძე უკანონოდ იყო თავმჯდომარედ არჩეული.

2017 წლის 8 ივნისს, 3 წლიანი დავის შემდეგ, უზენაესმა სასამართლომ საბოლოო გადაწყვეტილება მიიღო და გოჩა ჯოჯუას მოთხოვნა დააკმაყოფილა: სასამართლოს გადაწყვეტილებით, პარტიის თავმჯდომარედ ნინო ბურჯანაძის არჩევის გადაწყვეტილება გაბათილდა.