იგეგმება თუ არა ცვლილებები კონსტიტუციის ახალ ვარიანტში - მარკერტის განცხადება და უმრავლესობის პასუხი

პოლიტიკა - 18:20, 15 Sep, 2017

1333

ვენეციის კომისიის მდივნის თომას მარკერტის განცხადებით, არ არის გამორიცხული რომ საქრათველოს კონსტიტუციის პროექტში გარკვეული ცვლილებები განხორციელდეს:

„ქართული მხარე არაფერს დაგვპირდა, მაგრამ არც გამორიცხა, რომ გარკვეულ ცვლილებებს შეიტანს. ჩვენ ჩვენს შეფასებას 22 სექტემბერს გამოვაქვეყნებთ და ვნახოთ რა მოხდება. წინასწარ კომენტარს ვერ გავაკეთებ, როგორ განვითარდება მოვლენები მომავალში, თუმცა მინდა აღვნიშნო, როგორც გვითხრეს გარკვეული ცვლილებების შეტანა შეასაძლებელია. ასე რომ როდესაც გამოქვეყნდება შეფასება, რეკომენდაციებიც შემდგომ გახდება ცნობილი.“- განაცხადა თომას მარკერტმა „რუსთავი2“-თან სატელეფონო ინტერვიუს დროს.

მარკერტის ამ განცხადების ფონზე, საპარლემენტო უმრავლესობის წევრები აცხადებენ, რომ მმართველი გუნდი კონსტიტუციის ახალ ვარიანტში მესამე მოსმენის დროს ძირეული ცვლილებების შეტანას არ გეგმავს.

პარლამენტის საპროცედურო საკითხთა და წესების კომიტეტის თავმჯდომარე, გიორგი კახიანი აცხადებს, რომ ვენეციის კომისიის მიერ გადმოგზავნილი შენიშვნები მმართველმა გუნდმა სრულად გაითვალისწინა.

„საქართველოში დასრულდა ის დროს, როდესაც მესამე მოსმენის ფარგლებში შინაარსობრივ ცვლილებებს ახორციელებდნენ და ასე ვთქვათ, კანონებს ისე იღებდნენ, როგორც მათთვის იყო ასახული,“ - განაცხადა გიორგი კახიანმა.

პარლამენტის ფრაქცია „ქართული ოცნების“ წევრი, ანრი ოხანაშვილი აღნიშნავს, რომ მისთვის უცნობია, რა ნაწილის შესწორებაზე გააკეთა აქცენტი ტომას მარკერტმა თავის განცხადებაში.

„წინასწარი დასკვნა ჩვენთვის ცნობილია და ასახულიც არის ყველა ის, 23 შენიშვნიდან 20 შენიშვნა... მთავარი საკითხი არის ის, რომ ჩვენ, რა თქმა უნდა, ვითვალისწინებთ ვენეციის კომისიის დასკვნას და მხედველობაში მივიღებთ. ჩვენ გავეცნობით ყველა ვარიანტში და კიდევ ერთხელ ვიმსჯელებთ იქიდან გამომდინარე პროცედურულად, რის შესაძლებლობაც გვექნება,“ - განაცხადა ანრი ოხანაშვილმა.

წყარო "რუსთავი2"