„დავასუფთაოთ მსოფლიო, დავასუფთაოთ საქართველო“ - კამპანია საქართველოში მერვედ ტარდება

პოლიტიკა - 11:55, 14 Sep, 2017

1118

გარემოსა და ბუნებრივი რესურსების დაცვის სამინისტროში სპეციალური ბრიფინგი გაიმართა. მინისტრის პირველმა მოადგილემ სოლომონ პავლიაშვილმა შვედეთის ელჩთან საქართველოში-მარტინა ქვიქთან და მწვანეთა მოძრაობის თავმჯდომარესთან ნინო ჩხობაძესთან ერთად, საზოგადოებას „დავასუფთაოთ მსოფლიო-დავასუფთაოთ საქართველო“კამპანიის შესახებ ინფორმაცია გააცნო.

მიმდინარე წელს, კამპანია საქართველოში მერვედ ტარდება 15,16,17 სექტემბერს და მოიცავს 100-მდე ლოკაციას.

დედაქალაქში დასუფთავების აქცია 15 სექტემბერს, თბილისის ზღვის მიმდებარე ტერიტორიაზე გაიმართება (9;00 სთ) (ვარკეთილის მხრიდან); 16 სექტემბერს ლისის ტბაზე (10;00სთ) (იპოდრომის მიმდებარე ტერიტორია), ხოლო 17 სექტემბერს ქვემო ფონიჭალაში (10:00 სთ) (ემბავუდის საწარმოს მიმდებარე ტერიტორია,მტკვრის მარჯვენა სანაპირო)

კამპანია „დავასუფთაოთ მსოფლიო“ 1992 წლიდან პერმანენტულად ტარდება სექტემბრის მესამე კვირაში და მილიონობით ადამიანი ღებულობს მონაწილეობას. საქართველო 2010 წლიდან შეუერთდა კამპანიას და მის ფარგლებში მთელი ქვეყნის მასშტაბით ტარდება დასუფთავების აქცია სახელწოდებით-„დავასუფთაოთ საქართველო“.

მსოფლიო კამპანიის მოწოდებაა: ჩვენი ქვეყანა... ჩვენი პლანეტა... ჩვენი პასუხისმგებლობა...

კამპანია ხორციელდება გარემოსა და ბუნებრივი რესურსების დაცვის სამინისტროს მხარდაჭერითა და შვედეთის მთავრობის ფინანსური დახმარებით ორგანიზებას უწევს პროექტი ,,დავასუფთაოთ საქართველო“ (ფაზა III) განმახორციელებელი არასამთავრობო ორგანიზაციათა კონსორციუმი (,,საქართველოს მწვანეთა მოძრაობა/დედამიწის მეგობრები-საქართველო“, საქართველოს ბუნების მკვლევართა კავშირი „ორქისი“ და ,,ეკოლოგიური ცნობიერების ამაღლება და ნარჩენების მართვა“)

ბრიფინგს ქართველ და უცხოელ სტუმრებთან ერთად, რეგიონული განვითარებისა და ინფრასტრუქტურის სამინისტროს წარმომადგენლები და შვედეთის განვითარების სააგენტოს ხელმძღვანელი მოლი ლიენი ესწრებოდა.