პროფესიული კავშირების გაერთიანება ახალ თავმჯდომარეს ირჩევს - ერთ-ერთი კანდიდატი კი პროცესებში ხელისუფლების ჩარევაზე საუბრობს

პოლიტიკა - 10:52, 14 Sep, 2017

1200

ამ წუთებში პროფესიული კავშირების გაერთიანების ყრილობა მიმდინარეობს სადაც 219-მა დელეგატმა ახალი თავმჯდომარე უნდა აირჩიოს.

არჩევნებში სამი კანდიდატი მონაწილეობს: გაერთიანების მოქმედი თავმჯდომარე ირაკლი პეტრიაშვილი, ხელოვნების მუშაკთა პროფკავშირის თავმჯდომარე დავით ოქიტაშვილი და ენერგეტიკის მუშაკთა პროფკავშირის თავმჯდომარე ამირან ზენაიშვილი.

ადგილზე მობილიზებულია პოლიცია.

პროფკავშირების მოქმედი თავმჯდომარე ირაკლი პეტრიაშვილის თქმით ხელისუფლებას სურს, პროფკავშირებს ხელმძღვანელობდეს ადამიანი, რომელსაც ისინი გააკონტროლებენ.

„ჩვენ მუდმივად ვსაუბრობთ იმაზე, რომ ხელისუფლების ერთ-ერთი საკმაოდ ძლიერი და გავლენიანი წარმომადგენლები ბიზნესში, პარლამენტში და ა.შ. ებრძვიან ამ დამოუკიდებელ ინსტიტუტს იმიტომ, რომ მათ ე.წ. პროფკავშირს, რომელიც ჯიბეში ჰყავთ ჩასმული, თავისთან რკინიგზაში, გაუგეს გემო და რატომაც არა ნაციონალურ დონეზეც ესე მოხდეს,“-განაცხადა ირაკლი პეტრიაშვილმა.

პროფკავშირების თავმჯდომარეობის კანდიდატი ამირან ზენაიშვილი ამბობს, რომ დღევანდელ დღეზე და დელეგატთა გადაწყვეტილებაზეა დამოკიდებული შეინარჩუნებს თუ არა პროფკავშირები დამოუკიდებლობას.

„პროფკავშირი უნდა იყოს დამოუკიდებელი, ჩვენ წინასაარჩევნოდ დავინახეთ, რომ ერთმანეთის მიმართ ოპონენტებს ჰქონდათ პრეტენზიები. მაქსიმალურად ვცდილობდი რომ მე შემეკავებინა თავი, რადგან მივიჩნევდი, რომ ეს ისევ პროფკავშირების იმიჯზე იმოქმედებდა ცუდად. ის თუ ვინ ვისი კანდიდატია, მე ვფიქრობ ახლა ჩემთვის ამას მნიშვნელობა არ აქვს. მე ვიცი რომ მე ვარ კანდიდატი პროფკავშირების, მე ვარ კანდიდატი იმ დელეგატების, ვინც დღეს უნდა აგვირჩიოს,“-აცხადებს ამირან ზენაიშვილი.