"საქართველოს კონგრესში ბევრი მეგობარი ჰყავს"

"საქართველოს კონგრესში ბევრი მეგობარი ჰყავს" - კონგრესმენი დევიდ პრაისი

პოლიტიკა - 10:12, 14 Sep, 2017

934

ამერიკის შეერთებული შტატების წარმომადგენელთა პალატასთან არსებული „დემოკრატიის პარტნიორობის პალატის“ თავმჯდომარის მოადგილემ, დევიდ პრაისმა საქართველოს საპარლამენტო დელეგაციასთან გამართული შეხვედრის შემდეგ განაცხადა, რომ კონგრესის წევრები ყოველთვის მოხარულები არიან ქართველებთან შეხვედრით.

კონგრესმენმა ჟურნალისტებთან საუბრისას აღნიშნა, რომ საქართველო რუსეთის ფედერაციის მხრიდან ძლიერი ზეწოლის ქვეშ იმყოფება.

დევიდ პრაისმა ყურადღება საქართველოსა და ამერიკის შეერთებულ შტატებს შორის ეკონომიკური ურთიერთობების მნიშვნელობაზეც გაამახვილა.

„საქართველოს კონგრესში ბევრი მეგობარი ჰყავს. ჩვენ გვაქვს საერთო ღირებულებების სისტემა. საქართველოსა და ამერიკის შეერთებულ შტატებს შორის ეკონომიკური ურთიერთობა, ჰარმონიზაცია და სავაჭრო ურთიერთობების გაფართოება კარგია რამდენიმე მიზეზის გამო - პირველ რიგში, ჩვენ შეგვიძლია, ერთად ვიმუშაოთ და გავხსნათ ბაზარი ერთმანეთის ეკონომიკისთვის, მეორე - აქ არსებობს ძალიან ძლიერი უსაფრთხოების ინტერესი, იმის გათვალისწინებით, რომ საქართველოს ეკონომიკა იზრდება, ის თანდათან გაძლიერდება და ექნება შესაძლებლობა, ჰქონდეს რეგიონული მნიშვნელობა“,- განაცხადა სენატორმა.

დევიდ პრაისმა აღნიშნა ისიც, რომ კონგრესის წევრებთან შესახვედრა მმართველი გუნდისა და ოპოზიციის წარმომადგენლებმა ერთად გამართეს, რაც მისი შეფასებით, ძალიან მნიშვნელოვანია.

„ჩვენ გვქონდა შესაძლებლობა შევხვედროდით მმართველი გუნდის ხელმძღვანელობისა და ოპოზიციის წარმომადგენლებს. ძალიან მნიშვნელოვანია, რომ ისინი კამათის ნაცვლად, ერთად ამყარებენ კომუნიკაციას კონგრესის წევრებთან“,- განაცხადა კონგრესმენმა.

საქართველოს საპარლამენტო დელეგაცია, რომელსაც პარლამენტის თავმჯდომარის პირველი მოადგილე, თამარ ჩუგოშვილი ხელმძღვანელობს, ვიზიტით ამერიკის შეერთებულ შტატებში იმყოფება.