გარემოს დაცვის მინისტრის პირველი მოადგილე სატყეო სექტორში მომუშავე უცხოელ ექსპერტებს შეხვდა

პოლიტიკა - 09:49, 14 Sep, 2017

722

გარემოსა და ბუნებრივი რესურსების დაცვის მინისტრის პირველი მოადგილე სოლომონ პავლიაშვილი ევროდელეგაციის წარმომადგენელს საქართველოში ალვარო ორეტგას და უნგრეთის, ლიტვისა და სლოვაკეთის რესპუბლიკების სატყეო სექტორში მომუშავე ექსპერტებს შეხვდა. მხარეებმა ევროკავშირის პროექტზე -„ტყის მდგრადი მართვის გაძლიერება საქართველოში“ იმსჯელეს.

საქართველოს სატყეო სექტორის უკანასკნელი მოვლენების გათვალისწინებით, ლიტველმა და უნგრელმა ექსპერტებმა შეხვედრის მონაწილეებს გაუზიარეს ქვეყნების გამოცდილება ტყის ხანძრის პრევენციული და რეაგირების სისტემის განვითარების კუთხით.

ევროკავშირის საჯარო სამსახურების დაძმობილების პროექტი ლიტვის რესპუბლიკის გარემოს დაცვის სამინისტრომ უნგრეთის სოფლის მეურნეობის სამინისტროსთან ერთად დაიწყო, რაც მიზნად ისახავს ევროკავშირის წევრი ქვეყნების პრაქტიკისა და გამოცდილების გაზიარებას ტყის მდგრადი მართვის სისტემის შესახებ, რაც დაეხმარება საქართველოს დახვეწოს სატყეო სექტორის კანონმდებლობა ევროპული სტანდარტების გათვალისწინებით.

საკოორდინაციო საბჭოს შეხვედრას ევროპულ და ევრო-ატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის წარმომადგენელი და სატყეო სექტორში მომუშავე დონორი და არასამთავრობო ორგანიზაციების წარმომადგენლები (მსოფლიო ბანკი, GIZ) ესწრებოდნენ.