მიხეილ სააკაშვილმა საზღვრის უკანონოდ გადაკვეთის შესახებ ადმინისტრაციულ პროტოკოლს ხელი მოაწერა

პოლიტიკა - 12:57, 12 Sep, 2017

2968

სასტურმო „ლეაპოლისში“, რომელიც ამჟამად მიხეილ სააკაშვილი ცხოვრობს, დღეს უკრაინელი მესაზღვრეები და სამართალდამცავები მივიდნენ, რათა მისთვის საზღვრის უკანონოდ გადაკვეთის შესახებ ადმინისტრაციული ოქმის გადაეცათ.

მიხეილ სააკაშვილმა ადმინისტრაციულ პროტოკოლს ხელი მოაწერა, თუმცა განაცხადა , რომ ის პროცედურების დარღვევით იყო შემუშავებული.

„ყველაფერი ძალიან მარტივია. ეს ოქმი, საზღვრის გადაკვეთიდან სამი საათის განმავლობაში უნდა მოგეტონათ... ვერ იტყვით, რომ სადმე დავიმალე. მე ლვოვის მთავარ მოედანზე ვიყავი ათასობით ლვოველთან ერთად, უპრობლემოდ ჩავიბარებდი პროტოკოლს. მაგრამ მოაქვთ ახლა - ეს კანონდარღვევაა“ -განაცხადა მიხეილ სააკაშვილმა.

სააკაშვილმა ამავდროულად განაცხადა, რომ პასპორტი, რომელიც მას ავტობუსში მოპარეს, უკრაინის პრეზიდენტის პეტრო პოროშენკოს კაბინეტშია.

შეგახსენებთ, 10 სექტემბერს, მიხეილ სააკაშვილი უკრაინაში ჩავიდა. უკრაინა-პოლონეთის საზღვარზე სერიოზული დაბრკოლებების მიუხედავად სააკაშვილმა მისი გადაკვეთა მაინც შეძლო. " შეგინის" სასაზღვრო პუნქტთან, უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს და სააკაშვილი უკრაინის ტერიტორიაზე გადაიყვანეს, რის შემდეგაც მიხეილ სააკაშვილი, მხარდამჭერებთან ერთად ლვოვში ჩავიდა. პასპორტი კი, სააკაშვილის თქმით, ავტობუსში დახვდა და სამართალდამცავების მიერ ავტობუსის ჩხრეკისას, მათ პასპორტი მოიპარეს.

საზღვრის უკანონოდ გადაკვეთისთვის ეროვნულმა პოლიციამ სისხლის სამართლის საქმე აღძრა 204-ე მუხლის შესაბამისად. ადმინისტრაციული კოდექსის 204-ე მუხლი ჯარიმას ან 15 დღემდე ადმინისტრაციულ პატიმრობას ითვალისწინებს.