სააკაშვილი პოროშენკოს პასუხობს - ,,დანაშაული იყო ,,დანაღმვის“ იმიტაცია, ჩემი ხელმოწერის გაყალბება, მოქალაქეობის ჩამორთმევა“

პოლიტიკა - 15:22, 11 Sep, 2017

2637

ოდესის ყოფილი გუბერნატორმა მიხეილ სააკაშვილმა ლვოვში გამართულ ბრიფინგზე კომენტარი პეტრო პოროშენკოს განცხადებაზეც გააკეთა, უკრაინის პრეზიდენტის თქმით სააკაშვილს თვენახევარი ქონდა იმისთვის რომ მოქალაქეობის ჩამორთმევა გაესაჩივრებინა, მაგრამ მან ეს არ გააკეთა:

„პრეზიდენტი პოროშენკო ნამდვილად ხუმრობს. რამდენიმე მნიშვნელოვანმა საერთაშორისო მოღვაწემ მიმართა და მან ცინიკურად უპასუხა. მან ისარგებლა მომენტით, რომ უკრაინაში არ ვიყავი, გადაწყვეტილებამდე ერთი დღით ადრე შეცვალა კომისიის შემადგენლობა, მიიწვია კომისია ისე რომ სხვა წევრები არ გაუფრთხილებია და ჩემი მოქალაქეობის საკითხი 5 წუთში გადაწყვიტა, იმ პირობებში, როდესაც მან ყველა კანონის დარღვევით ადმინისტრაციიდან გაუშვა იმ დეპარტამენტის უფროსი, რომელიც მოქალაქეობის საკითხებს კურირებს.“- განაცხადა სააკაშვილმა.

კითხვაზე რამდენად კანონიერად თვლის საზღვარზე საკუთარ ქმედებებს , სააკაშვილმა პრეზიდენტის მიერ ჩადენილ უკანონობებზე დაიწყო საუბარი:

„მე დღეს გავიგე, რომ პრეზიდენტი საუბრობს რაღაც დანაშაულებზე და მინდა ვუპასუხო. დანაშაული იყო მოქალაქეობის ჩამორთმევა კონსტიტუციისა და უკრაინის კანონების დარღვევით, დანაშაული იყო ჩემი ხელმოწერის გაყალბება. დანაშაული იყო მატარებლის დაკავება და ხალხის მძევლად აყვანა. დანაშაული იყო ის, რომ მათ სასაზღვრო პუნქტის „დანაღმვის“ იმიტაცია მოახდინეს და მრავალსაათიანი რიგები შექმნეს, აი სწორედ ეს იყო დანაშაულები“- განაცხადა სააკაშვილმა.