მიხეილ სააკაშვილმა პირველ გეგმას დაუბრუნდა. მას შემდეგ, რაც ის მხარდამჭერებთან და უკრაინელ დეპუტატებთან ერთად იძულებული გახდა, მგზავრების გამო, მატარებელი დაეტოვებინა, მიიღო გადაწყვეტილება კვლავ ავტობუსით გამგზავრებულიყო.

შეგახსენებთ, რომ ევროპარლამენტარის და პოლონეთის ოფიციალური უწყებების ჩარევის მიუხედავად, უკრაინის მიმართულებით მატარებელს დაძვრის საშუალება არ მისცეს. დისპეჩერი აცხადებდა, რომ მატარებელი მანამ არ დაიძვრებოდა, სანამ სააკაშვილი ვაგონში იყო. მატარებელში ასული პოლონელი სამართალდამცავები, რომლებმაც სააკაშვილის პასპორტი შეამოწმეს, აცხადებდნენ, რომ პოლონურ მხარეს პრეტენზია არ ჰქონდა.

უცნობია, ვინ გასცა ბრძანება. სააკაშვილის თქმით, შს და ტრანსპორტის მინისტრი აღნიშნულზე პასუხისმგებლობას არ იღებდა, მისივე ვარაუდით, რჩება ერთადერთი - უკრაინის პრეზიდენტის პოროშენკოს ბრძანება.

ცოტა ხნის წინ ოფიციალური განცხადება გაავრცელა უკრაინის შს სამინისტრომ, ავაკოვის უწყებაში აცხადებენ, პოლონეთში მატარებლის გადაადგილებასთან მას არანაირი კავშირი არ აქვს.