ძველი დიდებიდან, ნანგრევებამდე - როგორც გამოიყურება სოფელი, სადაც "ოცნებამ" 2012 წელს ხმების 72%-ი მიიღო (ფოტოები)

პოლიტიკა - 15:31, 08 Sep, 2017

7755

ოზურგეთის მუნიციპალიტეტის სოფელი ნატანები, ერთ-ერთი ყველაზე დიდი სოფელი 5 ათასზე მეტი მცხოვრებით, ერთ დროს ყველაზე მდიდარი, დღეს კი უსიცოცხლო, მოშლილი ინფრასტრუქტურითა და ნახევრად დანგრეული შენობებით.

სოფელი, სადაც ათწლეულებია თვალშისაცემი არაფერი გაკეთებულა, გარდა იუსტიციის სამინისტროს მიერ ოფიციალურად და საზეიმოდ გახსნილი მომსახურების ცენტრისა.

ოზურგეთის "დემოკრატიული ჩართულობის ცენტრში" სხვადასხვა პარტიის კანდიდატების შეხვედრა, სოფელში დღეს არსებული მდგომარეობის ამსახველი ფოტო გამოფენის ფონზე შედგა.

საბავშვო ბაღის მოუწესრიგებელი ეზო, სავსე ბალახით და ხავსმოკიდებული კიბეებით, სკოლის გვერდით არსებული სპორტდარბაზის ამორტიზებული შენობა, რომელიც საფრთხეს უქმნის მოსწავლეების სიცოცხლესაც და ჯანმრთელობასაც, მხოლოდ წარსულის აჩრდილად ქცეული ის შენობები, რომლის გარემონტებაც გაცილებით ხელსაყრელი იქნებოდა, ვიდრე თუნდაც 800 ათას ლარად აშენებული მომსახურების ცენტრი, ამბულატორიის უფერული შენობა, რკინიგზის სადგური-დღეს კანდიდატებთან საუბარი სწორედ წლობით მოუგვარებელი პრობლემების ირგვლივ შედგა, რაც უცხო თვალისთვისაც ადვილი შესამჩნევია.

რაში ხედავენ გამოსავალს, როგორ შეძლებენ პრობლემების მოგვარებას და რა გზავნილები აქვთ ამომრჩევლებთან-დასმულ კითხვებზე მიღებული პასუხები ძირითადად ინვესტიციების მოზიდვას, ძლიერი თვითმმართველობის საჭიროებას, რომელიც შეძლებს გადაწყვეტილებების რეალურად მიღებას და არა ვიღაცის დაკვეთის შესრულებას და სოფლის მმართველის პრინციპულობასა და რეალურად გააზრებულ ვალდებულებებს ეხებოდა.

ცნობისთვის: 2012 წლის საპარლამენტო არჩევნებზე კოალიცია “ქართულმა ოცნებამ” სოფელ ნატანებში ამომრჩეველთა ხმების 72 პროცენტი მიიღო. ეს ერთ-ერთი ყველაზე მაღალი მაჩვენებელი იყო საქართველოს მასშტაბით.ბიძინა ივანიშვილი სოფელ ნატანებშია რეგისტრირებული და 2012 წლის არჩევნებზე ხმა სწორედ ამ სოფელში მისცა.

საბჭოთა პერიოდში ყველაზე მდიდარ სოფელს, სადაც ჩაის ფაბრიკის გარდა, ციტრუსების შემფუთავი ქარხანა და ტუნგის საშრობი ფარდულიც კი მოქმედებდა, მაშინ ძველი დიდების დაბრუნებასაც პირდებოდნენ, თუმცა დღეს, საუბარი ისევ ხუთი და უფრო მეტი წლის დანახულ პრობლემებზე იწყება- დაჟანგულ ჭიშკრებს მიღმა ბალახითა და სარეველით სავსე და მოუვლელობისგან გაშავებული შენობების ბედზე. უსიცოცხლოდ დარჩენილ სოფლებსა და უკიდურესად მძიმე მდგომარეობაში მყოფ მოსახლეობაზე.