სააკაშვილის წინააღმდეგ ორი ქვეყნის ხელისუფლებების გააქტიურება

სააკაშვილის წინააღმდეგ ორი ქვეყნის ხელისუფლებების გააქტიურება - "ქართული მხარე ამ პროცესში აგებს"

პოლიტიკა - 18:43, 07 Sep, 2017

1997

საქართველოს მესამე პრეზიდენტის მიხეილ სააკაშვილის უკრაინელი ადვოკატი, ნიკოლა ნიდილკოვი აცხადებს, რომ ქართული მხარე, სააკაშვილის ექსტრადირების მოთხოვნის პროცესში აგებს.

უფლებადამცველები მიხეილ სააკაშვილის წინააღმდეგ ორი ქვეყნის ხელისუფლებების გააქტიურებას, 10 სექტემბრით გამოწვეულ შიშს უკავშირებენ, როცა პოლიტიკოსი უკრაინაში ჩასვლას გეგმავს.

„თუ ქართული მხარე ამბობს რომ ისინი არ არიან ინიციატორები მიხეილ სააკაშვილის უკრაინის ტერიტორიიდან საქართველოში ექსტრადიციის, ეს ნიშნავს, რომ ქართული მხარე ამ პროცესში აგებს, მათ კარგად ესმით, რომ ეს უკანონოა და ამ გზით ცდილობენ, მოიხსნან როგორც პოლიტიკური, ასევე სამართლებრივი პასუხისმგებლობა, მაგრამ რატომ მიდის ქართული მხარე ასეთ ნაბიჯზე? ეს არის რუსეთის გავლენა საქართველოს ხელისუფლებაზე იმ მიზნით, რომ მოხდეს მიხეილ სააკაშვილის ჩამოშორება საერთაშორისო პოლიტიკური ასპარეზიდან და შესუსტდეს მისი გავლენა უკრაინის როგორც საშინაო, ისე საგარეო გავლენაზე.

უკრაინისა და საქართველოს ხელისუფლების ახლა გააქტიურება იმის შედეგია, რომ მოხდა გაცნობიერება იმის, რომ 10 სექტემბერს მიხეილ სააკაშვილის უკრაინის ტერიტორიაზე დაბრუნება, გარდაუვალია. ამის გამო, სიჩქარეში მათ გადაწყვიტეს მანიპულაცია დოკუმენტებით,“ - განაცხადა ნიკოლა ნიდილკოვმა.

მიხეილ სააკაშვილის მოძრაობა РУХ-ის იურისტი, პაველ ბოგომაზოვი აცხადებს, რომ მაშინ, როდესაც უკრაინიდან საქართველოში უნდა მოხდეს მოქალაქის ექსტრადირება, ამის შესახებ მოთხოვნა საქართველოდან უნდა მოდიოდეს და არა უკრაინის მხრიდან.

„კოდექსის თანახმად, ინიციატივა უკრაინიდან საქართველოში პირის ექსტრადირებაზე უნდა მოდიოდეს საქართველოს ხელისუფლების მხრიდან. ეს მოთხოვნა არ უნდა იყოს მოგონილი და უნდა იყოს გამყარებული არგუმენტებით,“ - აცხადებს პაველ ბოგომაზოვი.