"ირაკლი ჩხვირკია პოლიტიკური პატიმარია" - 20-მდე პარტია დაკავებულის გათავისუფლებას მოითხოვს

პოლიტიკა - 12:21, 07 Sep, 2017

1664

ბათუმის არეულობის ორგანიზების ბრალდებით დაკავებული ირაკლი ჩხვირკიას გათავისუფლების მოთხოვნით პროკურატურას პეტიციით მიმართეს.

პეტოციის ავტორები პოლიტიკური მოძრაობა „ახალი საქართველოს“ წევრები არიან, მოთხოვნას 20-მდე ოპოზიციური პარტია და საზოგადოებრივი მოძრაობა უერთდება.

პეტიციის ავტორები, მიიჩნევენ, რომ ირაკლი ჩხვირკია პოლიტიკური პატიმარია, რადგან მათი თქმით, საქმეში არ არსებობს არც ერთი მტკიცებულება, რომელიც დაადასტურებს, რომ ბათუმში მომხდარ არეულობის ორგანიზატორი ირაკლი ჩხვირკია იყო.

„როგორც ჩვენთვის და საზოგადოებისთვის ცნობილია ირაკლი ჩხვირკია არეულობის მომენტში არ იმყოფებოდა ადგილზე და არ იცნობდა პირებს, მე ვესაუბრე ადვოკატებს, ასევე ვიცნობთ საქმის შინაარსს და ამ ერთობლიობაში გვაძლევს იმის მტკიცებულებას, რომ ირაკლი ჩხვირკია არის ხელისუფლების პოლიტიკური პატიმარი,“-განაცხადა ”ახალი საქართველოს” პოლიტიკურმა მდივანმა პაატა მანჯგალაძემ.

ბათუმში მომხდარი არეულობის ორგანიზების ბრალდებით დაკავებული ირაკლი ჩხვირკიას უდანაშაულობაზე საუბრობს „ნაციონალური მოძრაობაც.“

აკაკი მინაშვილის თქმით, ხელისუფლება ჩხვირკიას კრიტიკული დამოკიდებულების გამო სჯის.

„გამოკეტილია ციხეში პოლიტიკური მოტივებით. მის საქმეს არაფერი საერთო არ აქვს სამართლიან სასამართლოსთან და რეალურ გამოძიებასთან. ეს არის ბრალდება, რომელიც ეფუძნება პოლიტიკურ მიზნებს იმიტომ, რომ ის არის კრიტიკულად განწყობილი ხელისუფლების მიმართ,“-აცხადებს აკაკი მინაშვილი.

შეგახსენებთ, რომ ირაკლი ჩხვირკია და მერაბ ღოღობერიძე სამართალდამცველებმა ბათუმში მარტში მომხდარი არეულობის ორგანიზების ბრალდებით დააკავეს.