ოპოზიცია დარწმუნებულია, რომ "ოცნება" საკონსტიტუციო ცვლილებებთან დაკავშირებით ვენეციის კომისიის რეკომენდაციებს არ გაითვალისწინებს

პოლიტიკა - 18:28, 06 Sep, 2017

977

"ქართულ ოცნებაში" ირწმუნებიან, რომ საკონსტიტუციო ცვლილებების მესამე მოსმენით მიღებამდე, პარლამენტი ვენეციის კომისიისგან კონსტიტუციის პროექტზე შუალედურ ანგარიშს გაეცნობიან,თუმცა ოპოზიციაში აცხადებენ, რომ მმართველი პოლიტიკური პარტია საკონსტიტუციო ცვლილებებთან დაკავშირებით ვენეციის კომისიის რეკომენდაციებს არ გაითვალისწინებს და საერთაშორისო ექსპერტების დასკვნას არ ელოდება.

„ქართული ოცნების" ხელისუფლება დაადგა ევროპული სტრუქტურების და ევროპული თამაშის წესების დემონსტრაციულად უგულებელყოფის გზას, რითც ისინი ცდილობენ პრორუსული ძალებისა და ადამიანების გულის მოგებას საქართველოში,"- განაცხადა ნინო გოგუაძემ.

„ხელისუფლება არის სირაქლემას პოზიციაში და ის საერთოდ ვერ ხედავს პრობლემას"- ეს განცხადება კი „რესპუბლიკური პარტიის" ლიდერმა თამარ კორძაიამ გააკეთა, რომელიც თვლის, რომ „ქართული ოცნება" პოლიტიკური ძალადობის გზას დაადგა.

"ლეიბორისტული პარტიის" წევრები მმართველი გუნდის წარმომადგენლებს „გადამგდებლებს" უწოდებენ.

„კარგად გვახსოვს კონსტიტუციური პროექტის განხილვის დროს პარლამენტის თავმჯდომარე როგორ იფიცებდა წმინდა ბიძინას ხატზე, რომ ვენეციის კომისიის ყველა შენიშვნა იქნებოდა გათვალისწინებული და მათი დასკვნის გარეშე არ მიიღებდნენ კონსტიტუციას, შემდეგ როგორც ჩანს, წმინდა ბიძინა გაუწყრა და ძალაში დატოვეს დრაკონული მაჟორიტარული არჩევნების წესი,"- განაცხადა გიორგი გუგავამ.