ხაშურის „ქართულ ოცნებაში“ დაპირისპირებაა. პარტიის წევრები ხაშურის ორგანიზაციის თავმჯდომარეს და აღმასრულებელ მდივანს ერათპიროვნულილ გადაწყვეტილებების მიღებაში ადანაშაულებენ. ხაშურის მუნიციპალიტეტის საკრებულოს თავმჯდომარის ვაჟა შუბითიძის თქმით ის ადამიანები, რომლებიც „ქართულ ოცნებაში“ პარტიის შექმნის დღიდანვე იყვნენ ახლა იგნორირებულნი არიან და სიებში და შტაბებში ადგილები ნაციონალური მოძრაობიდან პორტირებულმა ხალხმა დაიკავა:

„ხაშურის „ქართულ ოცნებაში“ დღეს ძალიან მრავლადაა წარმოდგენილი პორტირებული ხალხი, სწორედ ეს აღიზიანებთ ადამიანებს და გამოთქვეს შენიშვნები, რომლებიც არ ქინა გაზიარებული აღმასრულებელი მდივნის მიერ. ამას მოჰყვა გარკვეული ჩხუბი, დაპირისპირება და აღმასრულებელი მდივნის მხრიდან ხულიგნობა“- განაცხადა შუბითიძე. ის „ქართულილ ოცნების“ ცენტრალურ ხელმძღვანელობას მოუწოდებს ჩავიდნენ ხაშურში შეისწავლონ სიტუაცია და სათანადო დასკვნა გამოიტანონ.

„პარტიულ აქტივს აღიზიანებს ისიც, რომ მაჟორიტარი დეპუტატი არის იგნორირებული და ხალხის არჩეული დეპუტატის აზრი არ არის გაზიარებული. ვითხოვთ რომ რეაგირება მოხდეს დროულად და სამართლიანად“- აღნიშნა შუბითიძემ.

ხაშურის „ქართული ოცნების“ ხელმძღვანელობას თანაპარტიელების აზრის გაუთვალისწინებლობაში ადანაშაულებს „ოცნების“ წევრი ია ქურდაძეც:

„ვუთხარი, თქვენ როგორც ფრაქციის თავმჯდომარე, მაინტერესებს პარტიულ სიაში რა კრიტერიუმით ალაგებთ ადამანებს. უხეშად მომმართა: შენ ქალო გაჩუმდი, ვინ გკითხავს და შემაგინა. ეს გაიგონა ჩემმა პარტიის წევრმა და ამას მოჰყვა დაპირისპირება“- განაცხადა ქურდაძემ. მისი თქმით პარტია არაოფიციალურად ორ ნაწილადაა გაყოფილი, ერთი ნაწილი, რომელიც 2012 წლიდან არსებობს და მეორე რომელიც ხაშურის გამგებელმა გიორგი გურასპაშვილმა შექმნა, თავისი მოსვლის შემდეგ. ქურდაძის განცხადებით გურასპაშვილი გადაწყვეტილებებს ერთპიროვნულად, სხვების აზრის გაუთვალისწინებლად იღებს. როგორც ია ქურდაძე აღნიშნავს, გურასპაშვილმა საკუთარი ბილბორდი ქალაქში გამოაკვრევინა, მაშინ როდესაც ის მერობის კანდიდატად დარეგისტრირებულიც არაა, ქურდაძის თქმით ეს თვითნებური ქმედებაა არათანაბარ მდგომარეობაში აყენებს სხვა კანდიდატებს.

„ეს გააკეთა იმ ადამიანების დასანახად, რომლებიც იქით მიდიან ხოლმე საითაც ძალაა, თორემ ჩვენ, ოცნების ძირითადმა ბირთვმა ძალიან ზუსტად ვიცით მაგ ადამიანს რა შეუძლია რაიონისთვის გააკეთოს, რა თქმა უნდა ცუდის.“- განაცხადა ქურდაძემ.