მეოთხე დღეა ხანძარს ებრძვიან კახეთში, დილიდან ცეცხლის დაქრობით სამუშაოებში ავიაციის ჩართვა ვერ მოხერხდა, აღნიშნულის მიზეზი ართანას ტყეში მეტეოროლოგიური პირობები გახდა, რომელიც საგრძნობლად გართულდა. ადგილზე ძლიერი ნისლი და დაკვამლიანებაა. მთის ფერდობზე ამ დრომდე რჩება ცეცხლის ოთხი კერა.

"3-4 კერა არის, რომელიც შეიძლება სხვადასხვა ინტენსივობით იქნას განხილული. ვერტმფრენი იყო დღეს უკვე დილას ადრიანად შესული დაზვერვაზე. ალბათ, ცოტა ხანი ვერტმფრენებს მუშაობის საშუალება არ ექნებათ, დაკვამლიანებისა და ნისლის გამო. ნისლი თავისთავად კარგი არის, რადგან ის ტენის შემცველობასაც ნიშნავს ამავდროულად. ასე რომ, ართანის მიმართულებაზე ჩვენ სტაბილური, აბსოლუტურად კონტროლის ქვეშ მყოფი სიტუაცია გვაქვს," - განაცხადა კახეთის სახელმწიფო რწმუნებული, ირაკლი ქადაგიშვილი.

რთული რელიეფის გამო, მთაზე სამაშველო ტექნიკის შეყვანა ვერ ხერხდება. ხანძარსაწინააღმდეგო სამუშაოების დროს, გუშინ ართანაში 2 მეხანძრე-მაშველი ქვის ცვენის დროს მსუბუქად დაშავდა.