"ოპოზიციასა და უმრავლესობას შორის დიალოგი ქვეყნის შიგნით გადასაწყვეტი პროცესია, მასში ვენეციის კომისია ვერ ჩაერევა"- ფრუიძე

პოლიტიკა - 11:32, 04 Sep, 2017

1646

საკონსტიტუციო ცვლილებების პროექტის მესამე მოსმენით განხილვა სავარაუდოდ, სექტემბრის ბოლოს მოხდება.
"ქართული ოცნების" წარმომადგენელი ირინა ფრუიძე აცხადებს, რომ აკონსტიტუციო ცვლილებების პროექტის მესამე მოსმენით მიღებისას, არსებით ცვლილებებს არ უნდა ველოდოთ.
“ოპოზიცია ულტიმატუმის ენით გველაპარაკება. ამ ენით საუბრის შემთხვევაში, ჩვენ დიალოგზე ვერ ვილაპარაკებთ. დიალოგი არის იმ შემთხვევაში, როცა ორივე მხარე მზადაა, დათმობებზე წავიდეს. ამ შემთხვევაში ჩვენ ოპოზიციისგან ეს მზაობა ვერ დავინახეთ. ეს რესურსი, ფაქტობრივად, ამოწურულია. უმრავლესობამ ვენეციის კომისიის ყველა რეკომენდაცია გაითვალისწინა. თავიდანვე იყო განცხადება გაკეთებული, რომ ჩვენ კონსტიტუციის პროექტს ვენეციის კომისიის რეკომენდაციების საფუძველზე შევიმუშავებდით. ყველა რეკომენდაცია გათვალისწინებულია. საკონსტიტუციო ცვლილებების პროექტი არის დემოკრატიული და მაღალი სტანდარტების მქონე.
ვენეციის კომისია ინტერესდება, რამდენად სწორი, დემოკრატიულია კონსტიტუცია და რამდენად უწყობს ხელს ქვეყნის ხანგრძლივვადიან დემოკრატიულ განვითარებას. ვენეციის კომისიის პირვანდელ ვარიანტში ასახულია, რომ კონსტიტუციის შემოთავაზებული ტექსტი ყველა საერთაშორისო სტანდარტებში ჯდება. რაც შეეხება ოპოზიციასა და უმრავლესობას შორის დიალოგს, ეს ქვეყნის შიგნით გადასაწყვეტი პროცესია და ამაში ვენეციის კომისია ვერ ჩაერევა“, - განაცხადა ირინა ფრუიძემ.