წაართმევენ თუ არა ნინო ბურჯანაძეს 3 ნომერს, საარჩევნო კოდექსში შეტანილი ცვლილებით

პოლიტიკა - 10:51, 04 Sep, 2017

1274

ადგილობრივი თვითმმართველობის არჩევნებისთვის პოლიტიკური პარტიები აქტიურ წინასაარჩევნო რეჟიმში იმყოფებიან. გამოკვეთილია თბილისის მერობის რამდენიმე კანდიდატი. ცენტრალურ საარჩევნო კომისიაში უკვე რეგისტრირებული არიან არჩევნებში მონაწილე პარტიები. თითქმის გარკვეულია მათი საარჩევნო ნომრებიც. საარჩევნო კოდექსში სულ ბოლოს შეტანილი ცვლილების თანახმად, მეორე ნომერი ერგო ბოკერია-უგულავას გაერთიანებას ,,ევროპულ საქართველოს“, რომელზეც ერთ-ერთი პოლიტიკური სუბიე ქტი დაობდა.

თუმცა, შესაძლოა ნომრების სკანდალი კიდევ უფრო გამწვავდეს, ამჯერად, ნიუპოსტის ინფორმაციით, მესამე ნომერზე მოთხოვნა ცეტრალურ საარჩევნო ადმინისტრაციაში აკაკი ასათიანის ,,ტრადიციონალისტთა კავშირმა“ შეიტანა. ეს ის მესამე ნომერია, რომელსაც უკვე ფლობს ნინო ბურჯანაძის პოლიტიკური გართიანება და რომელი ნომრითაც თბილისის მერობაზე კენჭისყრას, ბურჯანაძესთან ბლოკში შესული, კახა კუკავა გეგმავს.

ჩვენი ინფორმაციით, განაცხადი ცესკო-ში აკაკი ასათიანის მხრიდან სამი დღის წინ შევიდა. ჯერჯერობით უცნობია, მიანიჭებენ თუ არა სამ ნომერს ტრადიციონალისტებს, თუმცა ფაქტია, დადებითი გადაწყვეტილების შემთხვევაში, ბურჯანაძე-კუკავას გაერთიანება, მსუბუქად რომ ვთქვათ, გაუკვეველ ვითარებაში აღმოჩნდება. სატელევიზიო სივრცეში გასულ მათ უფასო სარეკლამო კლიპებზე უკვე სამი ნომერია დატანილი.

წაართმევს თუ არა აკაკი ასათიანი ნინო ბურჯანაძეს საარჩევნო ნომერს, ეს ცესკო-ს გადაწყვეტილების შემდეგ გახდება ცნობილი.

,,ნიუპოსტი“ დეტალების დასაზუსტებლად, ცენტრალურ საარჩევნო ადმინისტრაციას დაუკავშირდა, თუმცა ცესკო-ში ამ ეტაპზე კონრეტული პასუხი ვერ მივიღეთ.