იმერეთის გამარჯვება, საქართველოს გამარჯვებაა

იმერეთის გამარჯვება, საქართველოს გამარჯვებაა - გიორგი კვირიკაშვილი

პოლიტიკა - 17:42, 02 Sep, 2017

2349

საქართველოს პრემიერ-მინისტრი გიორგი კვირიკაშვილი მერეთში ”ქართული ოცნების” მერობის კანდიდატების გამარჯვებაში დარწმუნებულია.
მისი თქმით, დღეს წარდგენილი ადამიანები პროფესიონალიზმის და კვალიფიციურობის ნიშნით არიან შერჩეულები.

” თითოეული მათგანი შერჩეულია კვალიფიციურობის და პროფესიონალიზმის ნიშნით. ეს ის ხალხია, რომლებიც მაქსიმუმს გააკეთებენ ხალხისთვის, ”ქართული ოცნება” მათ სრულ მხარდაჭერას და ნდობას უცხადებს. დარწმუნებული ვარ, რომ თითოეული მათგანი ამომრჩევლის მხარდაჭერას მოიპოვებს, გამარჯვებას მოიპოვებს და თავს არ დაზოგავს იმერეთისთვის და საქართველოსთვის. იმერეთის გამარჯვება, საქართველოს გამარჯვებაა”, - განაცხადა გიორგი კვრიკაშვილმა.
მთავრობის მეთაური ქუთაისელ ამომრჩეველს ტრიბუნიდან ჰპირდება, რომ ქუთაისი ძველ დიდებას დაიბრუნებს.
კვირიკაშვილის თქმით, მას სჯერა, რომ ქუთაისისა და მთელი იმერეთის სწრაფი განვითარება ახალ სიცოცხლეს შესძენს მთელ დასავლეთ საქართველოს.

”ქუთაისმა უნდა დაიბრუნოს თავისი ისტორიული მნიშვნელობა და მეორე უდიდეს ცენტრად გადაიქცეს. ჩვენი ძალისხმევის შედეგი - პირველ რიგში ჩვენი ხალხის კეთილდღეობაზე უნდა აისახოს. მარტო ასე არის შესაძლებელი ქვეყნის წინსვლა და განვითარება. არ შემიძლია არ აღვნიშნო საუნივერსიტეტო ქალაქის უპრეცედენტო მასშტაბის პროექტი. მოგეხსენებათ, პროექტს ფონდი ”ქართუ” ახორციელებს და მისი ღირებულება თბილისის ტექნოლოგიურ ცენტრთან ერთად მილიარდ ევროს აღწევს. საუნივერსიტეტო ქალაქი არა მხოლოდ ქუთაისის ან იმერეთის, არამედ ჩვენი ქვეყნის და მთელი რეგიონის სავიზიტო ბარათი გახდება მთელ მსოფლიოში. ჩვენს ქვეყანას აქვს ჯანსაღი ამბიცია იყოს რეგიონის ეკონომიკური ცენტრი. ჩვენი ქვეყნის სივრცითი განვითარების ცენტრი კი სწორედ ქუთაისი იქნება და ქუთაისი დაიბრუნებს ძველ დიდებას, მე ამას გპირდებით, ამას გპირდებათ ”ქართული ოცნება - დემოკრატიული საქართველო”, - განაცხადა კვირიკაშვილმა.