,,დაგვეხმარეთ!.. სოფელს საფრთხე ემუქრება“ - სტიქია მესტიაში, მოსახლეობა შველას ითხოვს

შემთხვევა - 21:07, 01 Sep, 2017

7516

მესტიაში სტიქიას ებრძვიან. გუშინ ბეჩოს ხეობის ბოლო სოფელ მაზერში, უშბიდან მეწყერი ჩამოწვა. მდინარეების ენგურის, კოლხურას, დოლურას და მესტიაჭალას ადიდების შედეგად, წაღებულია გზები და ხიდები. ადგილობრივები სასმელი წყლის გარეშე არიან დარჩენილი.

გარდა ამისა, მდინარე ენგურის ადიდების გამო მშენებარე ჰესი მესტია- ჭალა 1 დაზიანდა.

ადგილობრივი მოსახლეობა მთელი დღეა დახმარებას ითხოვს. მათი განცხადებით, საჭიროა დროულად ზომების მიღება, რომ მეწყერს გზა გაუხსნან და სოფელს აარიდონ.

,,მეგობრებო, მირიჩიეთ თუ შეიძლება როგორ მივაწვდინო ხმა ტელევიზიას. სვანეთში, ბეჩოს ხეობის ბოლო სოფელ მაზერში, უშბიდან ჩამოწვა მეწყერი. დღესაც თუ იწვიმა სოფლისაკენ დაიძვრება და კატასტროფა მოხდება. საჭიროა ზომების მიღება და ტრაქტორებისა და სხვა ტექნიკის აყვანა, რომ მეწყერს გზა სხვა მიმართულებით გაუხსნან და სოფელს აარიდონ. ერთხელ ასეთმა მეწყერმა სოფელ მაზერის ბოლოს, შიხრაში ტურისტული ბაზა წალეკა და კინაღამ სოფელი წაიღო, ბედად კალაპოტი გამოუჩნდა და სოფელს გვერდი აუარა. ამჟამად, უფრო ცუდი მდგომარეობაა, ეს კალაპოტი ამოუვსიათ და სოფელს სერიუოული საფრთხე ემუქრება. ადგილობრივი მოსახლეობა ყველა საშუალებით ითხოვს დროულად დახმარებას. დაგვეხმარეთ!!!“ - წერს სოციალურ ქსელში ნათია კვიციანი.