ამერიკელ კონგესმენთა დელეგაცია საქართველოს მიერ მიღწეულ პროგრესს დადებითად აფასებს

პოლიტიკა - 19:32, 01 Sep, 2017

1152

აშშ-ის კონგრესის ფინანსურ საკითხთა კომიტეტის წევრები საქართველოს პრემიერ-მინისტრ გიორგი კვირიკაშვილს შეხვდნენ.

დელეგაციას, კონგრესმენ ჰაროლდ როჯერსის ხელმძღვანელობით, პრემიერმა მთავრობის ადმინისტრაციაში უმასპინძლა.

ფინანსურ საკითხთა კომიტეტის წევრები მიესალმებიან სხვადასხვა სფეროში, მათ შორის ეკონომიკური განვითარების მიმართულებით დაგეგმილ რეფორმებს, რომლებიც მათ გიორგი კვირიკაშვილმა დეტალურად გააცნო.

საუბარი ასევე შეეხო იმ მნიშვნელოვან პროგრამებს, რომლებიც აშშ-ის დაფინანსებით ხორციელდება.

პრემიერ-მინისტრმა ამერიკელ კონგრესმენებს საქართველოს მხარდაჭერისთვის მადლობა გადაუხადა. მთავრობის მეთაურმა მნიშვნელოვან გადაწყვეტილებად შეაფასა აშშ-ის 2017 წლის ბიუჯეტის კანონში საქართველოს ტერიტორიების ოკუპაციის შესახებ გაკეთებული ჩანაწერი, რომლის თანახმად, აშშ-ის დაფინანსებით ვერ ისარგებლებს ვერც ერთი ქვეყანა, რომელმაც რუსეთის მიერ ოკუპირებული აფხაზეთისა და ცხინვალის რეგიონის დამოუკიდებლობა აღიარა, ან მათთან დიპლომატიური ურთიერთობები დაამყარა.

კონგრესმენებმა, პრემიერ-მინისტრთან შეხვედრისას, საქართველოს ტერიტორიული მთლიანობისა და სუვერენიტეტისადმი მხარდაჭერა კიდევ ერთხელ დაადასტურეს, ასევე, მადლობა გადაუხადეს საქართველოს, საერთაშორისო უსაფრთხოებაში შეტანილი წვლილისთვის.

აშშ-ის კონგრესმენთა წარმომადგენლობითი დელეგაციის შემადგენლობაში კონგრესმენები - ჰენრი კუელარი, ჯონ დუნკანი, ჯონ კარტერი, ჩარლზ ფლაიშმანი, სტივ ვუმაკი იმყოფებიან. შეხვედრას, საქართველოს მხრიდან, ვიცე-პრემიერი, საგარეო საქმეთა მინისტრი მიხეილ ჯანელიძე, სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში ვიქტორ დოლიძე და პრემიერ-მინისტრის მრჩეველი საგარეო ურთიერთობების საკითხებში, თედო ჯაფარიძე დაესწრნენ.