გიორგი კვირიკაშვილი საქართველოს ასოცირების ხელშეკრულების ამოქმედებიდან 3 წლის შესრულებას ულოცავს

პოლიტიკა - 15:21, 01 Sep, 2017

955

პრემიერ-მინისტრი გიორგი კვირიკაშვილი საქართველოს ულოცავს ასოცირების ხელშეკრულების ამოქმედებიდან 3 წლის შესრულებას, რომლის განმავლობაში ქვეყანაში არაერთი მნიშვნელოვანი რეფორმა განხორციელდა.

ძალიან მნიშვნელოვანი 3 წელი ჩვენი ქვეყნის ცხოვრებაში - ასე შეაფასა მთავრობის მეთაურმა გასული პერიოდი დღეს, ნატოსა და ევროკავშირში ინტეგრაციის კოორდინაციის სახელმწიფო კომისიების ერთობლივ სხდომაზე.

„რეფორმები, რომლებიც ამ სამ წელიწადში ჩვენს ქვეყანაში გატარდა, თითქმის ყველა სფეროს ეხება და უმნიშვნელოვანესია ჩვენი ქვეყნისთვის. ჩვენთვის ნომერ პირველი პრიორიტეტია ამ მიმართულებით თანმიმდევრული სვლა, რათა ჩვენი ქვეყანა ევროპული ოჯახის ნამდვილ წევრად ვაქციოთ", - განაცხადა პრემიერ-მინისტრმა.

გიორგი კვირიკაშვილმა ევროკავშირსა და ნატოსთან დაახლოების თვალსაზრისით საქართველოს მიერ მიღწეულ პროგრესზე ისაუბრა და აღნიშნა, რომ მთავრობა და შესაბამისი სახელმწიფო უწყებები ძალისხმევას არ იშურებენ, რათა მიღწეული იყოს უმთავრესი სტრატეგიული მიზანი - ევროკავშირსა და ნატოში საბოლოო გაწევრიანება.

„ყველა უწყება ჩართულია ამ ინტეგრაციის პროცესში. სწორედ ამიტომ გვაქვს ასეთი დონის სახელმწიფო კომისია, რათა ჩვენი ნაბიჯები შევაფასოთ, მოვახდინოთ იმ სფეროებისა და მიმართულებების იდენტიფიცირება, სადაც მეტი გვაქვს გასაკეთებელი და ერთობლივად გავწიოთ მაქსიმალური ძალისხმევა, რათა ჩვენი ქვეყანა იყოს მართლაც ჩემპიონი რეფორმების მიმართულებით", - აღნიშნა გიორგი კვირიკაშვილმა.

ნატოსა და ევროკავშირში ინტეგრაციის კოორდინაციის სახელმწიფო კომისიების ერთობლივ სხდომაზე, ვიცე-პრემიერმა, საგარეო საქმეთა მინისტრმა მიხეილ ჯანელიძემ ისაუბრა ნოემბერში დაგეგმილი „აღმოსავლეთ პარტნიორობის" სამიტისთვის მოსამზადებელი სამუშაოების მიმდინარეობის შესახებ; ასევე, სახელმწიფო მინისტრმა ევროპულ და ევროატლანტიკურ

სტრუქტურებში ინტეგრაციის საკითხებში ვიქტორ დოლიძემ წარადგინა ანგარიში საქართველოსა და ევროკავშირს შორის ასოცირების შესახებ შეთანხმების, ასოცირების დღის წესრიგის განხორციელების 2017 წლის სამოქმედო გეგმის პროექტისა და ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) განხორციელების 2017 წლის ეროვნული სამოქმედო გეგმის შესრულების შესახებ.