,,სტრასბურგში შეხვედრა ვეღარ შედგება, მაგრამ ვენეციის კომისიამ უნდა იცოდეს თუ რატომ ჩავდიოდით“

,,სტრასბურგში შეხვედრა ვეღარ შედგება, მაგრამ ვენეციის კომისიამ უნდა იცოდეს თუ რატომ ჩავდიოდით“ – მამუკა კაციტაძე

პოლიტიკა - 13:30, 01 Sep, 2017

1426

ხელისუფლება საკონსტიტუციო ცვლილებებთან დაკავშირებით ოპოზიციასთან დიალოგზე უარს აცხადებს, ამის შესახებ განცხადება მმართველმა გუნდმა დღეს გაავრცელა. როგორც განცხადებაშია ნათქვამი, უმრავლესობა საშემოდგომო სესიაზე კონსტიტუციის არსებლი ტექსტის მიღებას აპირებს. შესაბამისად 6 სექტემბერს დაგეგმილი შეხვედრა სტრასბურგში აღარ შედგება.

„ახალი მემარჯვენეების“ ლიდერი მამუკა კაციტაძე „ნიუპოსტთან“ საუბრისას აცხადებს, რომ საკოორდინაციო საბჭოს ვენეციის კომისიასთან კონტაქტი აღნიშნულ საკითხზე კვლავ ექნება:

„გუშინ კვალიფიციური ოპოზიციური პარტიების საკოორდინაციო საბჭო შეიკრიბა, კიდევ ერთხელ დაადასტურა სრული მზაობა სტრასბურგის შეხვედრაზე ჩასასვლელად, გაამზადა შესაბამისი წერილი, ჩვენეული დღის წესრიგით, სადაც ოთხი საკითხი იყო დასახელებული და აღარ დაუტოვა შანსი ხელისუფლებას იმისა, რომ 6 სექტემბერთან დაკავშირებით მას რაღაც ეთქვა, გუშინვე ტომას მარკეტის განცხადება გაკეთდა, რომ ისინი 6 სექტემბრისთვის რაღაც შეთავაზებებს აპირებენ მხარეებისთვის, რომელიც შეიძლება მისაღები იყო, ამ ფონზე, ოპოზიციაც მზად არის, ვენეციის კომისია არა თუ მზად არის, არამედ წინადადებებიც კი აქვს შესათავაზებელი, უცებ გამოდის ხელისუფლება და ამბობს, რომ ულტიმატუმებისა და წაყენებული პირობების გამო, აზრს ვეღარ ხედავს, მადლობას უხდის ვენეციის კომისიას და არ მიდიან, ეს გააკეთა ოპოზიციის ერთმა ნაწილმა და რაზეც მე ყოველთვის ვამბობდი, რომ ეს იყო მაშველი რგოლი ხელისუფლებისთვის უარის სათქმელად სტრასბურგში ჩასვლაზე.

ჩვენ კიდევ გვექნება ვენეციის კომისიასთან კონტაქტი, თუ რას იტყვის ის ჩვენს მზაობაზე და შეთავაზებულ დღის წესრიგზე. შეხვედრა ვეღარ შედგება, მაგრამ ჩვენ უნდა განვიხილოთ ვერსია ვენეციის კომისიასთან შეხვედრაზე, რათა მათ იცოდნენ თუ რატომ ჩავდიოდით, რა წინადადებები ჰქონდათ მათ, ესეც მაინტერესებს და უფრო მეტი სიმკვეთრე რომ შევიტანოთ ჩვენს და მათ პოზიციებში. ვენეციის კომისიასთან საკოორდინაციო საბჭოს აუცილებლად ექნება კიდევ კონტაქტი“, - აღნიშსნავს მამუკა კაციტაძე.