საქართველოს პარლამენტის თავდაცვისა და უშიშროების კომიტეტის თავმჯდომარე კრიზისების მართვის საბჭოს სისტემასთან დაკავშირებით კომენტარს აკეთებს. ირაკლი სესიაშვილის განცხადებით საბჭოს სისტემა იმ საფრთხეებსა და მოსალოდნელ კრიზისებს მაქსიმალურად უნდა დაუახლოვდეს, რაც შეიძლება ქვეყნის წინაშე დადგეს.

ჟურნალისტებთან საუბარში სესიაშვილმა ყურადღება გაამახვილა კრიზისების მართვის საბჭოს ფუნქციაზე:

„არის რეგიონები, სადაც სამი თვე ნალექი არ მოსულა. შესაბამისად, ეს ზრდის რისკს, რომ ამ რეგიონებში ხანძარი იყოს. სამწუხაროდ, ასეთი რისკები კვლავ დარჩება, ჩვენ კი, შესაძლებლობის მობილიზაცია უნდა მოვახდინოთ, რათა მაქსიმალურად მზად ვიყოთ, რომ ერთი მხრივ, პრევენციული ღონისძიებები გავატაროთ, მეორე მხრივ კი, საჭიროების შემთხვევაში კრიზისებს გავუმკლავდეთ.

ბრიტანეთში საბჭო კრიზისებთან ბრძოლაში მაშინ ერთვება, როცა საქმე ეროვნული დონის კრიზისს ეხება. კრიზისების მართვის საბჭო საკოორდინაციო ორგანოა და არა იმის მექანიზმი, რომ რაიმე ტექნიკური საშუალება ჰქონდეს ამა თუ იმ კრიზისს ებრძოლოს. მაშინ, როცა შინაგან საქმეთა სამინისტრო ბორჯომის ხეობაში ხანძარს საკუთარი ძალებით ვერ გაუმკლავდა, ამ პროცესში სხვა სამინისტროები ჩაერთვენ.

არსებული კრიტიკა პოლიტიკურად მოტივირებული და არაკვალიფიციური იყო. ყველას ვურჩევ, რომ კრიზისების მართვის საბჭოს საქმიანობის შესაბამის ინსტრუქციებს გაეცნოს. მას ძალიან მაღალი შეფასება აქვს, რომელიც არა მხოლოდ ქართული, არამედ ბრიტანულიცაა. როცა რეფორმაზე ვსაუბრობთ, ვცილობთ, ჩვენი სისტემა იმ საფრთხეებს და მოსალოდნელ კრიზისებს მაქსიმალურად დავუახლოვოთ, რაც შეიძლება ქვეყნის წინაშე დადგეს. ბრიტანეთში კრიზისების მართვის საბჭო პროცესებში მაშინ ერთვება, როცა კრიზისი ეროვნულ დონეს მიაღწევს. ჩვენი ოპონენტები არაკვალიფიციურები არიან და ვერც კი ერკვევიან, კრიზისების მართვის საბჭო რა არის. ადგილზე ერთხელაც არ მისულან და არ უნახავთ, ამ საბჭოს როგორი ტექნიკური შესაძლებლობები აქვს. ბრიტანელი ექსპერტების ძალიან მაღალი შეფასება გვაქვს, რომლებიც მიიჩნევენ, რომ საქართველოში არსებული სისტემა გაცილებით უფრო ძლიერია, ვიდრე ბრიტანეთში არსებული „კობრა“, - დასძინა სესიაშვილმა.