ბიძინა ივანიშვილის სახელზე რეგისტრირებული მი-8 ტიპის ვერტმფრენები - ბორჯომისა და აბასთუმნის ტყეებში გაჩენილი ხანძრის სალიკვიდაციო პროცედურებში აღნიშნული ვერტმფრენების გამოუყენებლობას ოპოზიციის რიგებში ეხმაურებიან.

ოპოზიციის კრიტიკას მმართველ გუნდში პასუხობენ. საპარლამენტო უმრავლესობის რიგებში ფიქრობენ, რომ ყოფილი პრემიერ-მინისტრის წინააღმდეგ გაკეთებული განცხადებები მიზანმიმართული კამპანიის ნაწილია.

„ჩვენ ეს არ ვიცოდით, რომელ კომპანიას რა ქონება ჰქონდა ამ კუთხით. სახელმწიფოს უნდა ჰქონდეს ეს ვერტმფრენები, ბიძინა ივანიშვილის რა შუაშია. სახელმწიფომ უნდა ჩადოს ბიუჯეტში. აქამდე რომ გაეკეთებინა, უკეთესს იზამდა, მაგრამ ეს უნდა ესმოდეს იმ სამსახურს, რომელიც ამაზე არის ანგარიშვალდებული. მიზანმიმართული მომენტია - ბიძინა ივანიშვილის მიმართ შავი პიარის მსგავს რაღაცას აგორებენ, თორემ ახლა თუ ვერტმფრენი ავღანეთშია, ავღანეთში არსებულ ტექნიკურ საშუალებაზე შეიძლება, თვითონ ბიძინა ივანიშვილმაც არ იცოდეს, მის რომელ კომპანიას რა ქონება აქვს,“- აცხადებს გედევან ფოფხაძე.