დღეს, დაახლოებით ორი საათის წინ, თბილისში, საბურთალოზე ვაჟა-ფშაველას 24 ნომერში ძლიერი აფეთქება მოხდა, შემთხვევა სავარაუდოდ ბუნებრივ აირზე მომუშავე წყლის გამათბობლის გაუმართაობამ გამოიწვია.

აფეთქება მრავალსართულიანი კორპუსის პირველ სართულზე მოხდა, შედეგად დაიწვა 50 კვადრატულ მეტრამდე საცხოვრებელი ფართი. სახლში შემთხვევის დროს 35 წლის მამაკაცი იმყოფებოდა, იგი ქუჩაში თავად გამოვიდა, თუმცა ამ დროისათვის შოკურ მდგომარეობაში იმყოფება, სასწრაფო დახმარების ბრიგადამ დაშავებული ხეჩინაშვილის სახელობის კლინიკაში გადაიყვანა, იგი ამ დროისათვი რეანიმაციულ გაყოფილებაშია მოთავსებული, აღენიშნება სხეულის 45%-ის დამწვრობა.

აფეთქების შედეგად დაშავდა ახლოს მდებარე მაღაზია და ჩამოიშალა კორპუსის ერთ-ერთი კედელი, ცეცხლი სხვა არც ერთ საცხოვრებელ სახლზე არ გავრცელებულა.

ადგილობრივების განცხადებით, აფეთქება იმდენად ძლიერი იყო, რომ ახლოს მდებარე კორპუსებშიც ფანჯრების მინები ჩაიმსხვრა.

ამ დროისათვის ადგილზე ექსპერტ-კრიმინალისსტები მუშაობენ. მომხდარის ოფიციალური მიზეზი მოგვიანებით გახდება ცნობილი, პირველადი დასკვნით აფეთქება ბუნებრივმა აირმა გამოიწვია.

ფაქტზე შსს-მ გამოძიება დაიწყო. როგორც „ნიუპოსტს“ შსს-ს პრესსამსახურში განუცხადეს, მომხდარზე გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც ჯანმრთელობის ნაკლებად მძიმე ან მძიმე დაზიანება გამოიწვია.