"ხელისუფლებას კონსენსუსის ყალბი სურათის შექმნაში ხელს არ შევუწყობთ"- ოპოზიცია მაჟორიტარული საარჩევნო სისტემის გაუქმებას ითხოვს

პოლიტიკა - 16:54, 30 Aug, 2017

1259

"თავისუფალი დემოკრატების" ლიდერი შალვა შავგულიძე აღნიშნავს, რომ საკონსტიტუციო ცვლილებებთან დაკავშირებით ხელისუფლებასთან დიალოგს მხოლოდ მაშინ აქვს აზრი თუ მმართველი პოლიტიკური ძალა მაჟორიტარული საარჩევნო სისტემის გაუქმებას დათანხმდება და საკითხს განხილვის პირველ ეტაპზე დააბრუნებს. ოპოზიცია 2020 წელს არჩევნების პროპორციული წესით ჩატარებას მოითხოვს.

"დღეს იმ პოლიტიკური პარტიის წარმომადგენლები შევიკრიბეთ, რომლებმაც ორჯერ უკვე გავაკეთეთ ერთობლივი განცხადება და ეს განცხადება საზოგადოებისთვის ცნობილია. ჩვენ ვაყენებთ ერთადერთ საკითხს - თუ ხელისუფლებას მართლა სურს კონსენსუსის მიღწევა კონსტიტუციურ რეფორმასთან დაკავშირებით, საარჩევნო თემატიკასთან მიმართებით, ის მის მიერვე შემოთავაზებულ მოცემულობას უნდა დაუბრუნდეს, რაზეც ამდენიხნის მანძილზე ვიმუშავეთ - რომ გადავდივართ სრულად პროპორციულ საარჩევნო სისტემაზე.

თუ ხელისუფლება მზად არის პროპორციული საარჩევნო სისტემის ირგვლივ მოხდეს მსჯელობა, მზად ვართ დავსხდეთ მაგიდასთან და ვიმსჯელოთ კონსტიტუციურ რეფორმასთან დაკავშირებით, ხოლო თუ მმართველ პოლიტიკურ პარტიას სურს რომ ამ მაგიდაზე მსჯელობა იყოს მხოლოდ მის მიერ, თვითნებურად განხილულ და შერეულ მაჟორიტარულ-პროპორციულ სისტემაზე, ასეთ შემთხვევაში ჩვენ დიალოგში მონაწილეობას არ მივიღებთ.
ხელისუფლებას კონსენსუსის ყალბი სურათის შექმნაში ხელს არ შეუწყობთ. ვიმეორებ, თუ ხელისუფლება დაუბრუნდება იმ საკითხს რაზეც 6 თვის განმავლობაში ვიმსჯელეთ, მზად ვართ დიალოგისთვის, თუმცა თუ მას მის მიერ მიღებული, მოწონებული და მოფიქრებული ვარიანტი გაასაღოს კონსენსუსად, ამაში ხელს არ შეუწყობთ"- აღნიშნა შალვა შავგულიძემ.