საკონსტიტუციო ცვლილებები და "მოლაპარაკებებიდან გაქცეული ხელისუფლება" - ოპოზიცია ვენეციის კომისიას წერილს უგზავნის

პოლიტიკა - 14:57, 30 Aug, 2017

1111

"დაიცავი კონსტიტუციაში" შემავალი პოლიტიკური პარტიები ამ წუთებში "ეროვნულ დემოკრატიული მოძრაობის" ოფისში, ვენეციის კომისიისთვის გასაგზავნ წერილზე მსჯელობენ.

წერილში ოპოზიცია საკონსტიტუციო რეფორმაზე და ჩაშლილ მოლაპარაკებებზე გაამახვილებს ყურადღებას.

საპარლამენტო და არასაპარლამენტო ოპოზიცია აღნიშნავს, რომ მმართველი პოლიტიკური ძალა ერთპარტიულ კონსტიტუციას იღებს.

მათი თქმით, ხელისუფლების მიზანია, რომ ქვეყნის მთავარ დოკუმენტზე დიალოგი არ შემდგარიყო.

”თუ დიალოგი არ შედგება, ოპოზიცია სტრასბურგში იმისთვის არ წავა, რომ კონსენსუსის ილუზია შეიქმნას. ხელისუფლება ეშმაკობს, ამბობს, რომ ოპოზიცია მზად არ არის დიალოგისთვის. ყველაფერს აკეთებს, რომ დიალოგი არ შედგეს და მაშინ სტრასბურგში წასვლას აზრი არა აქვს. პასუხისმგებლობა ამაზე ხელისუფლებას ეკისრება"- განაცხადა ნიკა რურუამ.

"ეროვნულ დემოკრატიული პარტიის" ლიდერის, ბაჩუკი ქარდავას თქმით კი ხელისუფლება "მოლაპარაკების მაგიდიდან გაიქცა".

"საქართველოს ხელისუფლება მოლაპარაკების მაგიდიდან გაიქცა, მან ჩაშალა დიალოგი და ჩვენ ახლა მოგვიწევს საერთაშორისო თანამეგობრობის საქმის კურსში ჩაყენება, რეალურად როგორ ვითარდებოდა პროცესები. ფაქტობრივად ქვეყანაში „ქართული ოცნება“ აპირებს ერთპარტიული კონსტიტუციის მიღებას მესამე მოსმენით და ამ რეალობაში შესაძლოა ძალიან დიდ სირთულეებს წააწყდეს ქართული სახელმწიფო და სამართლიანი არჩევნები ერთის მხრივ და მეორეს მხრივ „ქართული ოცნებაც“, რომელსაც ქართული საზოგადოება არ შეარჩენს ერთპარტიულ კონსტიტუციას,“-განაცხადა ბაჩუკი ქარდავამ.