ელისაშვილის საარჩევნო შტაბის ხელმძღვანელი გამოკითხვაზე იმყოფებოდა

პოლიტიკა - 12:54, 29 Aug, 2017

1702

სოციალურ ქსელში გავრცელებულ ვიდეოსთან დაკავშირებით, რომლის ავტორებიც აცხადებდნენ, რომ ალეკო ელისაშვილის რეგისტრაციისთვის ხელმოწერებს „ნაციონალური მოძრაობა“ აგროვებდა, ალეკო ელისაშვილის საარჩევნო შტაბის ხელმძღვანელი დღეს გამოკითხვაზე იმყოფებოდა. ივანე ნორაკიძე გამოკითხვაზე საკუთარი განცხადების საფუძველზე დაიბარეს. მისი თქმით აღნიშნული მასალა ელისაშვილის დისკრედიტაციისკენაა მიმართული და საქმეზე გამოძიება 162-ე მუხლით უნდა დაიწყოს, რაც ამომრჩევლის მოტყუებას და მისი ნების გამოვლინებაში ხელის შეშლას გულისხმობს:

„გამომძიებელს ქონდა შეკითხვები ჩვენს მიერ შეტანილ საჩივართან დაკავშირებით. ვიდეო რა თქმა უნდა ემსახურებოდა ალექსანდრე ელისაშვილის დისკრედიტაციას და მისი მხარდამჭერების მოტყუებას და შეცდომაში შეყვანას, იმიტომ რომ ამომრჩეველი, რომელიც ხელს აწერდა მათ ბლანკზე, შემდგომ აღარ მიდიოდა ელისაშვილის შტაბში და აღარ აწერდა ხელს ნამდვილ ბლანკზე, რითაც ერთის მხრივ ამომრჩევლის ნებაზე ხდებოდა ზემოქმედება და ის ტყუვდებოდა, მეორეს მხრივ კი კანდიდატი კარგავდა მხარდამჭერთა ხელმოწერებს“- განაცხადა ნორაკიძემ გამოკითხვიდან გამოსვლის შემდეგ.