"ძალის გამოყენებით ჩასვეს მანქანაში"-რატომ დააკავა პოლიციამ ოზურგეთის ისტორიული მუზეუმის დარაჯი

შემთხვევა - 23:59, 28 Aug, 2017

6506

დაახლოებით ორი საათის წინ, ოზურგეთში, ისტორიული მუზეუმის დარაჯი პოლიციამ დააკავა.

დაკავების მიზეზი პოლიციასთან შელაპარაკება გახდა. ამის შესახებ თვითმხილველებმა განაცხადეს.

მათივე თქმით, ადგილზე პოლიციის რამდენიმე ეკიპაჟი იმყოფებოდა. შუახნის მამაკაცი პიკაპში ძალის გამოყენებით ჩასვეს და გურიის მთავარ სამმართველოში გადაიყვანეს.

"სამი მანქანით მოვიდნენ, ერთი პიკაპი იყო. ის კაც ვინც დააკავეს, ვიცით, აქ ვხედავთ, მუზეუმში დარაჯად მუშაობს. ხელი კრეს, ძალით ჩასვეს პიკაპში, უყვიროდნენ და ისე წაიყვანეს. პოლიციის შენობასთან გააჩერეს და შიგნით შეიყვანეს. არ ვიცით კონკრეტულად რას ედავებიან, საუბარი იყო, რომ დაკავებულს პოლიციასთან შელაპარაკება მოუვიდა. სხვას ვერაფერს გეტყვით"-აცხადებენ ტაქსის მძღოლები, რომლებიც ფაქტს უშუალოდ შეესწრნენ.

რამდენიმე წუთის წინ, გურიის მთავარი სამმართველოში ოზურგეთის ისტორიული მუზეუმის დირექტორი, გოგა ტრაპაიძეც მივიდა. სავარაუდოდ ამ წუთებში მისი დაკითხვა მიმდინარეობს.

ჩვენთვის მოწოდებული ინფორმაციით, ტრაპაიძეს თავად ტაქსის მძღოლებმა დაურეკეს და მომხდარის შესახებ შეატყობინეს.

მომხდართან დაკავშირებით შსს პრესსამსახურს დავუკავშირდთ, უწყებიდან მოწოდებული ინფორმაციით, ერთი პირი ადმინისტრაციული წესითაა დაკავებული.

ოზურგეთის ისტორიული მუზეუმი ოზურგეთის საპატრულო პოლიციის შენობის გვერდით მდებარეობს.