სტრასბურგის მოსამართლის კანდიდატურა - საქართველოს იუსტიციის მინისტრის თეა წულუკიანის განცხადებით, მთავრობას სამი კანდიდატის ნაცვლად ოთხი წარედგინება.

თეა წულუკიანის თქმით, დღეს მეორე გასაუბრება გაიმართა, იმ კანდიდატების შესარჩევად, რომელთაგანაც მთავრობა ორს აარჩევს და ლადო ჭანტურიასთან ერთად ევროსაბჭოს წარუდგენს:

„კომისიის გადაწყვეტილებით, ეს კანდიდატები არიან ლალი ფაფიაშვილი, თამარ ალანია. ჩემდა გასაოცრად, მესამე და მეოთხე კანდიდატები არიან, რომელთაც ერთი და იგივე ქულები მიიღეს და მათ შორის არჩევანის გაკეთება შეუძლებელი გახდა. ესენი არიან - სოსო ბაჩიაშვილი და ოთარ სიჭინავა. როგორც თავმჯდომარე ვფიქრობდი, რომ მთავრობისთვის სამი კანდიდატი წარმედგინა, მაგრამ ვინაიდან მესამე ადგილზე ორი კანდიდატი იდენტური ქულებით აღმოჩნდა, კომისიამ გადაწყვეტილება მიიღო, რომ სამის ნაცვლად, ოთხი კანდიდატი წარვადგინოთ და მთავრობამ ის ორი შეარჩიოს, რომელთაც მომდევნო დღეების განმავლობაში ევროსაბჭოს წინაშე წარადგენს. ევროსაბჭოს წერილში ცალსახად არის მითითებული, რომ მათთვის სასურველი იქნებოდა საკონსტიტუციო სასამართლოში ან უზენაეს სასამართლოში გამოცდილების მქონე კანდიდატი. ასეთი ლალი ფაფიაშვილი გახლავთ, რომელიც ამავე დროს, ქალი კანდიდატია. მჯერა, რომ ის ღირსეულ კონკურენციას გაუწევს ლადო ჭანტურიას და ალბათ, ექსპერტთა საბჭოს დადებით შეფასებას დაიმსახურებს.

რაც შეეხება ალანიას, როგორც კომისიის თავმჯდომარეს, წინა გასაუბრებისას და ახლაც მასთან კითხვის ნიშნები მქონდა, რომელიც მოხსნილი ვერ იქნება. ეს გვანცა ყუფარაძის საქმეს ეხება, მაგრამ მისი საშუალო ქულა მაღალი აღმოჩნდა და მეორე ადგილზე გავიდა. შესაბამისად, იმ კანდიდატურებს შორის მოხდა, ვინც მთავრობას წარედგინება. თუ მას სტრასბურგში მთავრობა წარადგენს, გასაუბრებაზე იქნება დამოკიდებული, როგორ წარმოადგენს თავს ექსპერტების წინაშე“, - განაცხადა წულუკიანმა.

სტრასბურგის მოსამართლეობის კანდიდატის შესარჩევმა კომისიამ კანდიდატები მთავრობისთვის წარსადგენად უკვე შეარჩია. კენჭისყრის შედეგად, მთავრობას კომისიის მიერ წარედგინება თამარ ალანიას, ლალი ფაფიაშვილის, იოსებ ბაჩიაშვილისა და ოთარ სიჭინავას კანდიდატურები.