სტრასბურგის მოსამართლეობის შესარჩევი კონკურსი - ამ წუთებში პროცესი მიმდინარეობს, აღსანიშნავია, რომ აღნიშნული საკითხი საკმაოდ პრობლემური გახდა. არსებულ ვითარებაზე და მიმდინარე მოვლენებზე კომენტარს აკეთებს საქართველოს სახალხო დამცველი.

უჩა ნანუაშვილის განცხადებით, ხარვეზები ყველა ეტაპზე არსებობდა და დღევანდელი პროცესიც, სავარაუდოდ ხარვეზებით წარიმართება. ამის მიზეზად ომბუდსმენი ასახელებს იმ ფაქტს, რომ მკაფიო კრიტერიუმები არ არის განსაზღვრული იმისათვის, რომ შეფასების სისტემა ნათელი იყოს:

"სამწუხაროდ, ხარვეზები იყო ყველა ეტაპზე და დღევანდელი კონკურსიც სავარაუდოდ, ხარვეზებით წარიმართება, რადგან მკაფიო კრიტერიუმები არ არის განსაზღვრული იმისთვის, რომ შეფასების სისტემა იყოს ნათელი, ხაზს ვუსვამ იმას, რომ საჯარო არ არის კომისიის წევრების მიერ გამოტანილი გადაწყვეტილებები და ეს კიდევ ერთი შემაბრკოლებელი ფაქტორია. თუკი გადაწყვეტილებები იქნება ღია და საჯარო, ეს იქნებოდა კიდევ ერთი ნაბიჯი პროცესის გამჭვირვალობისკენ. ასევე კომისიის შემადგენლობასთან დაკავშირებით არის კითხვის ნიშნები, რომ ფაქტიურად უმცირესობაში არიან დამოუკიდებელი ორგანიზაციები და არის მთელი რიგი გარემოებები, რაზეც კომისიას აქამდეც უნდა ემსჯელა", - განაცხადა უჩა ნანუაშვილმა.

სტრასბურგში წარსადგენი მოსამართლეების შერჩევა საქართველოს უკვე მესამედ უწევს. ევროპის ადამიანის უფლებათა სასამართლომ საქართველოს მთავრობას წარდგენილი კანდიდატები ორჯერ დაუწუნა.