ხვალ სტრასბურგის მოსამართლეობის კანდიდატები უნდა შეარჩიონ - ადვოკატთა ასოციაციის თავმჯდომარე ზაზა ხატიაშვილი კომისიის ხვალინდელ სხდომას პროტესტის ნიშნად არ დაესწრება.

დღეს გამართულ პრესკონფერენციაზე ხატიაშვილმა სტრასბურგის მოსამართლეობის კანდიდატთა ახალი სიაც გაასაჯაროვა. კონკურსში მონაწილეობას - იოსებ ბაჩიაშვილი, ლალი ფაფიაშვილი, კონსტანტინე ვარძელაშვილი, ოთარ სიჭინავა, ირაკლი ადეიშვილი, თამარ ალანია, ლუიზა ხითარიშვილი, კონსტანტინე კორკელია და ნინო ბაქაქური იღებენ.

"ხვალ, იუსტიციის სამინისტროში გაიმართება საქართველოდან ევროპის ადამიანის უფლებათა სასამართლოში ასარჩევი სამთავრობო კომისიის საკონკურსო სხდომა, სადაც უნდა შეირჩეს 5 კანდიდატი, რომელთაგანაც შემდეგ საქართველო არჩევს 2 კანდიდატს და წარადგენს ევროპის საბჭოში. მე ვარ ამ კომისიის შემადგენლობაში და ვინაიდან სამთავრობო კომისიის თავმჯდომარე არის იუსტიციის მინისტრი თეა წულუკიანი, პროტესტის ნიშნად არ ვიღებ მონაწილეობას ხვალინდელ შეხვედრაში. საქართველოს მთავრობა უკვე მერამდენედ ცდილობს ისეთი კანდიდატის გაყვანას, რომელიც "თავს მოჭრის" საქართველოს სტრასბურგის სასამართლოში", - აცხადებს ზაზა ხატიაშვილი.

მისივე განცხადებით, ხვალინდელ სხდომაში მონაწილეობას არ მიიღებს ასევე ახალგაზრდა იურისტთა ასოციაციის თავმჯდომარე ანა ნაცვლიშვილი.