პარლამენტის ვიცე სპიკერი გიორგი ვოლსკი საქართველოს სხვადასხვა რეგიონში გაჩენილ ხანძრებსა და საოკუპაციო ძალების მოქმედებებს შორის დროში საეჭვო დამთხვევაზე საუბრობს.

ვოლკის თქმით, ხანძრების სერია მას შემდეგ დაიწყო, რაც საოკუპაციო ხაზთან ახლოს ოკუპანტებმა ხანძარსაწინააღმდეგო ხნულები გაავლეს.

„ეს არის ფაქტი, მოცემულობა, რომ ეს ასე მოხდა. ე.წ. ანტისახანძრო ხნულები გაივლო და ამას დაემთხვა. თუმცა, კიდევ ერთხელ გავიმეორებ, რომ ნაჩქარევი დასკვნები არ არის საჭირო არაფერზე და უნდა შევინარჩუნოთ ის სიმშვიდე, რომელიც ახასიათებს სტრატეგიას და პოლიტიკას.

ყველაფერი უნდა დაშვებულ იქნას. შეიძლება, შიდა იყოს, შეიძლება, გარე ფაქტორებით იყოს განპირობებული. უამრავი ამის საფუძველი არსებობს. აღმოჩენილია რაღაც ფაქტები, რომ ვიფიქროთ, ეს გამიზნულად კეთდება,“ - აცხადებს გიორგი ვოლსკი.