საქართველოს პრემიერ-მინისტრმა გიორგი კვირიკაშვილმა ჟურნალისტებთან საუბრისას ბორჯომში, სტიქიის ზონაში არსებული ვითარება შეაფასა.

პრემიერის განცხადებით, მძიმე ტექნიკა და ცოცხალი ძალა მთელი ღამის განმალობაში განაგრძობს მუშაობას, ამ ეტაპზე არსებობს ცეცხლის რამდენიმე კერა, თუმცა, მათი ლოკალიზება მოხერხდა. მოსახლეობას კი ამ დროისათვის საფრთხე არ ემუქრება:

„მოგეხსენებათ, რომ მთელი დღის განმავლობაში მიდიოდა ხანძარსაწინააღმდეგო ოპერაცია. როგორც ავიაციის, ასევე ცოცხალი ძალის მეშვეობით, დღის მეორე ნახევარში, მიუხედავად პოზიტიური მოლოდინებისა, კლიმატური პირობები გართულდა, იყო ძლიერი ქარი, ამიტომ გააძლიერა რამდენიმე კერა, ამ წუთას სიტუაცია კონტროლს ექვემდებარება, მოსახლეობისთვის საფრთხე არ არსებობს, ვცდილობთ, რომ ღამის განმავლობაში გავაგრძელოთ მძიმე ტექნიკით მუშაობა, იმისათვის, რომ დილისთვის მოვემზადოთ და დილით გავაგრძელოთ ისევე, როგორც მთელი დღის განმავლობაში დღეს, ავიაციის მეშვეობით, ასევე შევიძინეთ გარკვეული ახალი აპარატურა ცოცხალი ძალისთვის, ღამის განმავლობაში გაგრძელდება შტაბის მუშოაბა, დილით გვექნება უფრო ცხადი სურათი, ამ ეტაპზე გვაქვს ცეცხლის კერები, რომლებიც კონტროლირებადია. ძალიან ბევრი რამ არის ქარზე დამოკიდებული, ამ წუთისთვის გავრცელების საფრთხე მოსახლეობის მიმართულებით არ არსებობს, მაგრამ საჭიროა ინტენსიური მუშაობა, რათა მივიდეთ საცეცხლე ადგილებამდე. დილამდე ვიმუშავებთ და გვექნება უფრო ცხადი სურათი“, - განაცხადა კვირიკაშვილმა.

რაც შეეხება დივერსიის ვერსიას, პრემიერ-მინისტრმა აღნიშნულ საკითხზე საუბრისგან თავი შეიკავა:

„ჩემი საქმე არ არის სხვადასხვა ვერსიების განხილვა, ჩემი საქმე არის ის, რომ მაქსიმალურად მოკლე პერიოდში სტიქიის მინიმალიზება მოვახდინოთ“, - დასძინა პრემიერ-მინისტრმა.