"თუ არ შეიცვლება სულისკვეთება, ვერ მივიღებთ მოქმედ კონსტიტუციას"- მარგველაშვილი ოპოზიციასა და მმართველ გუნდს შორის დაწყებულ დიალოგს გამოეხმაურა

პოლიტიკა - 12:48, 22 Aug, 2017

1078

საქართველოს პრეზიდენტი გიორგი მარგველაშვილი საკონსტიტუციო ცვლილებებთან დაკავშირებით ოპოზიციასა და მმართველ გუნდს შორის დაწყებულ დიალოგს გამოეხმაურა. მარგველაშვილის თქმით კონსულტაციების დაწყება მისასალმებელია, თუმცა ის შედეგიანი მხოლოდ მაშინ იქნება თუ მმართველი გუნდი სულისკვეთებასა და მიდგომას შეიცვლის და კონსტიტუცია ნამდვილად კონსენსუსზე იქნება დაფუძნებული:

„ამ წლის დასაწყისში, როდესაც შეიქმნა საკონსტიტუციო კომისია, მე მტელ საზოგადოებას მოვახსენე ამ კომისიის სულისკვეთებიდან გამომდინარე , რა შედეგები ექნებოდა მას. მიუხედავად იმისა, რომ ენთუზიაზმი ძალიან მაღალი იყო ამ კომისიაში ჩართვის და იქ მუშაობის, სამწუხაროდ ბოლომდე გამართლდა ის რაც ვუთხარი საზოგადოებას, რომ ასეთი სულისკვეთებით შექმნილი კომისია დაასრულებდა ისე როგორც დაასრულა. დაასრულა ნულოვანი კონსენსუსით, ფაქტიურად ჩაკეტილი პროცესით. მიუხედავად იმისა რომ ჩვენ მაგიდაზე გვედო ნულოვანი კონსენსუსით მიღებული პროექტი, რომელსაც ფაქტიურად მხოლოდ ერთი პარტია აწერდა ხელს ისიც შიგნით შეუთანხმებლად, პარლამენტმა რეკორდული სისწრაფით მიიღო ორი მოსმენით, რითიც პოლიტიკური პროცესი შეიყვანა სრულ ჩიხში. დღეს რადგან გაჩნდა იმის გააზრება, რომ კონსტიტუცია არა ხელის გადაგრეხვით და პულტების მეშვეობით, არამედ კონსენსუსზე უნდა იყოს დამყარებული, მე მივესალმები ამ კონსულტაციებს, თუმცა ამავე დროს უნდა გავითვალისწინოთ, რომ თუ არ შეიცვლება სულისკვეთება, რომ ჩვენ გვაქვს პულტები და ჩვენ ყველაზე ჭკვიანები ვართ, ჩვენ ვერ მივიღებთ მოქმედ კონსტიტუციას. მე მივესალმები კონსულტაციებს, მაგრამ ამავე დროს ყურადღებით ვაკვირდები არსებულ პროცესებს.“- განაცხადა გიორგი მარგველაშვილმა