საქართველოს პრემიერ-მინისტრი გიორგი კვირიკაშვილი აცხადებს, რომ წაღვერის ტყეში გაჩენილი ხანძრის ქრობის სამუშაოებში მონაწილეობას 5 ვერტმფრენი მიიღებს. ამ ეტაპზე სამი ვერტმფრენი მუშაობს, შუადღისთვის კი მათ კიდევ ორი ვერტმფრენი შეუერთდება:

„უკეთესი მდგომარეობაა, ზუსტად აქვთ მონიშნული ის ზონები, რა ზონებიც არის ჩასაქრობი. სამი ვერტმფრენი მუშაობს ერთი დაემატა. თურქეთიდან გზაშია კიდევ ორი ვერტმფრენი. ქარის გამო დილით ვერ ჩამოფრინდნენ ახლა არიან გზაში და სულ რაღაც 2 საათში ისინიც ჩაერთვებიან. ღამისთვის გვექნება უკეთესი მდგომარეობა.

პრინციპში რაც საჭიროა ყველაფერს აკეთებენ. ერთი კერა არის ყველაზე მძიმე, ეს არის ქედის გადაღმა კერა, რომელზეც ახლა მთელი ძალა იქნება მიმართული. ქვემოდან აგვყავს ტუმბოებით წყალი, გარდა ამისა რამდენიმე ეკიპაჟი დადგება იქედან და დაღმართზე ჩააქრობენ და მე მგონი, რომ უშველის. ხანძრის გავრცელების საფრთხე არსებობს თუ ეს ქედი არ ჩავაქრეთ, თუ ეს ქედი ჩაქრა მწვავე ფაზას გადავივლით, მე მგონია, რომ გავუმკლავდებით,“-აცხადებს გიორგი კვირიკაშვილი.