პრეზიდენტის ადმინისტრაციის უფროსი დღეს სენაკის მე-7 საჯარო სკოლაში იმყოფებოდა. გიორგი აბაშიშვილმა სკოლის ბიბლიოთეკა დაათვალიერა, რომელიც პრეზიდენტის სარეზერვო ფონდის ხელშეწყობით ფუნქციონირებს.

სენაკის საჯარო სკოლიდან გიორგი აბაშიშვილმა პროექტის "მე და კონსტიტუცია" ახალი ეტაპის დაწყება პროექტის ორგანიზატორებთან ერთად გამოაცხადა. "დემოკრატიის ლაბორატორია" კონსტიტუციის შესახებ ცოდნის ამაღლების მიზნით, მოსწავლეებს შორის კონკურსს უკვე მესამედ ატარებს. სენაკის მე-7 საჯარო სკოლა პროექტის ერთ-ერთი აქტიური მონაწილეა.

გიორგი აბაშიშვილის განცხადებით, - " ეს არის განსაკუთრებული სკოლა, სადაც ძალიან ბევრი დევნილია აფხაზეთიდან. ბუნებრივია, ჩვენ გავაგრძელებთ მაქსიმალურად, რამდენადაც ეს შესაძლებელი იქნება, ამ სკოლის მხარდაჭერას მისი განსაკუთრებული სტატუსიდან გამომდინარე. მნიშვნელოვანია, რომ ეს ბიბლიოთეკა, რომელიც პრეზიდენტის სარეზერვო ფონდიდან დაფინანსდა, ძალიან აქტიურად გამოიყენება სხვადასხვა ტიპის ტრენინგების, სემინარების ორგანიზებისთვის. ამავდროულად დღეს მქონდა პატივი, აქ, სენაკის სკოლაში, რომელიც ერთ-ერთი აქტიური მონაწილეა პროექტის "მე და კონსტიტუცია" დამეანონსებინა კონკურსის ახალი სეზონის დაწყება. პროექტი ახალი სასწავლო წლიდან დაიწყება და დარწმუნებული ვარ, რომ მასში კვლავ აქტიურად ჩაერთვებიან სკოლის მოსწავლეები მთელი საქართველოს მასშტაბით. რამდენიმე ათასი სკოლის მოსწავლე უკვე მონაწილეობდა ამ პროექტში. სიახლე, რომელსაც შეიძენს ეს პროექტი არის ის, რომ უფრო მეტი ყურადღება დაეთმობა მოსწავლეების მიერ გამოვლენილ ანალიტიკურ მხარეს, რაც გამოჩნდა, რომ მოსწავლეებს ნამდვილად აქვთ და მნიშვნელოვანია მათი უკვე ანალიტიკური უნარების, არამხოლოდ შეჯიბრებითობა, არამედ ანალიტიკური უნარების გაგება კონსტიტუციის შესახებ.“

თემურ ბოკუჩავას სახელობის აფხაზეთის N7 საჯარო სკოლა, რომელიც სენაკში სამხედრო ქალაქში, დევნილთა დასახლებაში მდებარეობს, საქართველოს პრეზიდენტის სარეზერვო ფონდიდან გასულ წელს დაფინანსდა, მოხდა ბიბლიოთეკის აღდგენა და ტექნიკური აღჭურვა.