გაუძვირდება თუ არა თბილისის მოსახლეობას ელექტროენერგია

გაუძვირდება თუ არა თბილისის მოსახლეობას ელექტროენერგია - "თელასი" ტარიფის გაზრდას ითხოვს

პოლიტიკა - 16:43, 17 Aug, 2017

1576

„თელასი“ 2018 წლიდან სამომხმარებლო ტარიფის ზრდას ითხოვს.აღნიშნულ საკითხზე სემეკ-ში 18 აგვისტოს ადმინისტრაციული წარმოება დაიწყება, კომისიას გადაწყვეტილების მისაღებად 150-დღიანი ვადა აქვს. 2018 წლისთვის ელექტროენერგიის განაწილების, გატარებისა და მოხმარების ტარიფები დადგინდება.

„ზრდის ან შემცირების პროგნოზირება ამ ეტაპზე შეუძლებელია, გამომდინარე იქიდან რომ სამომხმარებლო ტარიფის ყველა შემადგენელი კომპონენტის გადათვლა უნდა მოხდეს და უნდა დადგინდეს ტარიფი. კომპანია სამომხმარებლო ტარიფის ზრდის საჭიროებას აფიქსირებს. ტარიფში გათვალისწინებული იქნება გონივრული ხარჯები. კომპანია აპელირებას აკეთებს ხელშეკრულებაზე მასსა და სახელმწიფოს შორის, თუმცა მარეგულირებელი კომისია, როგორც აქამდე ახლაც ტარიფის დაანგარიშებას და დადგენას განახორციელებს მოქმედი სატარიფო მეთოდოლოგიის საფუძველზე.“- განაცხადა სემეკის ტარიფების დეპარტამენტის დირექტორმა გივი სანიკიძემ.

ენერგეტიკის მინისტრი წინასწარი პროგნოზების გაკეთებისგან თავს იკავებს, ილია ელოშვილის თქმით ტარიფების დადგენა ცალსახად სემეკის კომპეტენციაა, თუმცა მინისტრი აღნიშნავს იმასაც, რომ ტარიფზე გავლენას ახდენს რამდენიმე ფაქტორი, მათ შორის როგორიცაა კომპანიის მიერ განხორციელებული ინვესტიციები თუ ეროვნული ვალუტის კურსი:

„ამას გადაწყვიტავს მარეგულირებელი კომისია, დაადგენს საბოლოო ტარიფს მეთოდოლოგიის მიხედვით. როცა ხდება გადახედვა შეიძლება შემცირდეს, შეიძლება გაიზარდოს. ეს არის ძალიან ბევრ ფაქტორზე დამოკიდებული მათ შორის განხორციელებულ ინვესტიციებზე, ეროვნული ვალუტის კურსზე და სხვა“- განაცხადა ილია ელოშვილმა.

ტარიფი, რომელიც ახლა ძალაშია მიმდინარე წლის 31 დეკემბრამდე მოქმედებს, 2018 წლის ახალი ტარიფი კი მარეგულიერებლმა კომისიამ 2018 წლის 1 იანვრამდე უნდა დაადგინოს.

აღსანიშნავია, რომ „თელასის“ ტარიფები გახლავთ ერთ-ერთი მიზეზი იმისა, რომ რუსულმა სახელმწიფო კომპანია „ინტერ რაომ“ საქართველოს მთავრობის წინააღმდეგ საერთაშორისო არბიტრაჟში სარჩელი შეიტანა. კომპანია ლარის გაუფასურების შედეგად მიყენებული ზარალის ანაზღაურებას ითხოვს