"ეს არის საოკუპაციო რეჟიმის რეალური სახის გამოვლინება"- დოლიძე თამარ მეარაყიშვილის დაკავების ფაქტზე

პოლიტიკა - 14:49, 17 Aug, 2017

1688

ახალგორის რაიონში საოკუპაციო რეჟიმის პროკურატურის მიერ სამოქალაქო აქტივისტის თამარ მეარაყიშვილის დაკავების ფაქტს საქართველოს პრეზიდენტის ადმინისტრაცია გამოეხმაურა, როგორც პრეზიდენტის საპარლამენტო მდივანმა განაცხადა, ეს არის აქტივისტზე ზეწოლა და რაც მთავარია ეს არის საოკუპაციო რეჟიმის რეალური სახის ერთერთი გამოვლინება:

„აღსანიშნავია, რომ ჩვენ ვიცით მისი სამოქალაქო აქტივიზმის შესახებ, ის არის გამორჩეული მოქალაქე და ეს ქმედება მიმართული მის მიმართ არის თავისუფლების უკანონო აღკვეთა სულ მცირე, აქტივისტზე ზეწოლა და რაც მთავარია ეს არის საოკუპაციო რეჟიმის რეალური სახის ერთერთი გამოვლინება, იქნება ეს ეთნიკური წმენდა, ქართველების ჩაგვრა, ქართული ენის სწავლების აკრძალვა, ჩვენი აქტივისტების თუ მოქალაქეების გატაცება, ეს ყველაფერი არის ოკუპაციური რეჟიმის სახის გამოვლინებები და ძალიან მნიშვნელოვანია, რომ ერთი, ჩვენ ყველამ ვიხმაროთ ყველა ღონე იმისათვის, რომ ეს დავგმოთ, საერთშორისო საზოგადოებამ დაგმოს აქტიურად ეს ქმედება, რაც მთვარია ჩვენ ყველამ ვიზრუნოთ, რომ ჩვენი მოქალაქეების უფლებები იყოს შესაბამისად დაცული.“ - განაცხადა ანა დოლიძე.

შეგახსნებთ სამოქალაქო აქტივისტი თამარ მეარაყიშვილი, რომელიც 16 აგვისტოს ე.წ სამხრეთ ოსეთის პროკურატურამ დააკავა, მრავალსაათიანი დაკითხვების შემდეგ სახლში დაბრუნდა, თუმცა 18 აგვისტოს დილით ის პროკურატურაში ისევ არის დაბარებული დაკითხვის გასაგრძელებლად.

თამარ მეარაყიშვილი საოკუპაციო რეჟიმის პროკურატურის მხრიდან ზეწოლაზე ადრეც საუბრობდა. ის ბოლოს აგვისტოს დასაწყისში დაკითხეს, „ეხო კავკაზა“-სთვის მიცემული კომენტარის გამო. 8 ივნისს კი სამოქალაქო აქტივისტი თვითმხილველების თვალწინ გაიტაცეს და ცხინვალში წაიყვანეს, ის მხოლოდ 24 საათის შემდეგ გაათავისუფლეს.

მეარაყიშვილი რაიონის პრობლემურ საკითხებზე და ხელმძღვანელ პირთა ქმედებების შესახებ ფეისბუკის საკუთარ გვერდზე აქტიურად წერს, ის რესპონდენტის სტატუსით თანამშრომლობს რუსულენოვან გამოცემა “ეხო კავკაზასთანაც“. საოკუპაციო რეჟიმის წარმომადგენლების უკმაყოფილებას სწორედ ეს ფაქტი იწვევს.