შპს „მულტიტესტის“ ლაბორატორიულ კვლევას, რომლის თანახმადაც, სავაჭრო ცენტრ “დიდუბის”, იგივე ელიავას ბაზრობის ტერიტორიაზე მწვანე ნარგავების გაშენება შეუძლებელია თბილისის მერი უნდობლობას უცხადებს:

„“მეეჭვება ეს კვლევა და ამ კვლევის შედეგი. მითუმეტეს, რომ არავის უნახავს დღემდე კვლევა თავიდან ბოლომდე და ის თუ რას ეყრდნობა. დიდი სიამოვნებით გავეცნობოდი თუ მივიღებდი ასეთ კვლევას. თუმცა დღეს, თანამედროვე ტექნოლოგიები ისეა განვითარებული, რომ სახურავებზე აკეთებენ მწვანე საფარს და არ მგონია, რომ ელიავას ტერიტორიაზე საჭიროების შემთხვევაში შეუძლებელი იყოს გამწვანებული სივრცის მოწესრიგება,” - განაცხადა დავით ნარმანიამ.

„მულტიტესტის“ კვლევის თანახმად გრუნტის შედგენილობა (ნიადაგი 20%, ქვაღორღი 80%) არადამაკმაყოფილებელია მწვანე ნარგავობის გასაშენებლად. მკვლევარების თქმით კი ამ ტერიტორიაზე ხე-მცენარეების გასაშენებლად საჭირო იქნება ქვა-ღორღის და სამშენებლო მასალის მოხსნა, გატანა ტერიტორიიდან და ამის შემდეგ ახალი ნიადაგის შეტანა.

თბილისის გენერალური გეგმის მიხედვით, რომლის საჯარო განხილვები ახლა მიმდინარეობს, ე.წ. ელიავას ბაზრობის ტერიტორიაზე საკრეკრეაციო ზონა უნდა მოეწყოს.