ნინო ბურჯანაძე და კახა კუკავა საარჩევნო ბლოკს ქმნიან - მერობის კანდიდატი სავარაუდოდ დიმიტრი ლორთქიფანიძე იქნება

პოლიტიკა - 13:35, 17 Aug, 2017

1750

არასაპარლამენტო ოპოზიციის ნაწილი 21 აგვისტოს თბილისის მერისა და საკრებულოს თავმჯდომარეების ერთიან კანდიდატებს დაასახელებს. „ნიუპოსტის“ ინფორმაციით საარჩევნოდ „თავისუფალი საქართველო“ და „დემოკრატიული მოძრაობა“ ერთიან ბლოკს ქმნიან.

როგორც კახა კუკავა „ნიუპოსტთან“ საუბრისას აცხადებს, ამ ეტაპზე მიმდინარეობს კონსულტაციები, თუმცა, ჯერჯერობით უცნობია ბლოკში მხოლოდ ორი სუბიექტი გაერთიანდება თუ სხვა პარტიებსაც ვიხილავთ.

რაც შეეხება თბილისის მერობის კანდიდატს, კუკავა-ბურჯანაძის ბლოკი ერთიანი კანდიდატის წარდგენას გეგმავენ. „ნიუპოსტის“ ინფორმაციით მათი კანდიდატი დიმიტრი ლორთქიფანიძე იქნება.

"თავისუფალი საქართველოს" ლიდერმა კახა კუკავამ პრესკონფერენციაზე განაცხადა, რომ ოპოზიციაში რომელი პარტიები არიან ერთობისთვის მზად, უკვე სურათი გამოიკვეთა:

„როგორც ორშაბათამდე, აგრეთვე ორშაბათის შემდეგაც იმ იპოზიციური პარტიებისთვის, რომლებიც ერთობის იდეას ემხრობიან, კონსულტაციების კარი ღია რჩება და ნებისმიერი გონივრული კომპრომისისთვის მზად ვართ.

ძალიან კარგი სტარტი იყო. მაშინაც დარწმუნებული ვიყავი და ახლაც დარწმუნებული ვარ, რომ ერთიანი კანდიდატის დასახელება ოპოზიციისთვის გარანტირებული გამარჯვების წინაპირობა იქნებოდა. სამწუხაროდ, რამოდენიმე ოპოზიციურმა პარტიამ მერობის კანდიდატი დამოუკიდებლად დაასახელა. ჩვენთვის განსაკუთრებით გულდასაწყვეტი იყო "პატრიოტთა ალიანსის" მიერ კანდიდატის დასახელება. ისინ ჩვენი ყოფილი პარტნიორები არიან და საარჩევნო ბლოკში ერთად ვიყავით. ცოტათი გულდაწყვეტილები დავრჩით, რომ მათ მიერ თბილისის მერობის კანდიდატის წარდგენა ტელევიზიით შევიტყვეთ", - აღნიშნა კუკავამ.