საოკუპაციო რეჟიმის პროკურატურამ ახალგორელი აქტივისტი თამარ მეარაყიშვილი დააკავა

პოლიტიკა - 19:37, 16 Aug, 2017

3360

დღეს ახალგორში, დღის მეორე ნახევარში სამოქალქო აქტივისტი თამარ მეარაყიშვილი დააკავეს. ინფორმაციას ამის შესახებ „ეხო კავკაზა“ ავრცელებს. დაკავებამდე მეარაყოშვილმა მათ კორესპონდენტთან დაკავშირება შეძლო და განაცხადა, რომ ის გაჩერა, ე.წ პროკურატურის გამომძიებელმა ალან ბიაზროვმა ყოველგვარი განმარტებების და დოკუმენტების წარდგენის გარეშე და განუცხადა, რომ ორდერი და განმარტებები მაშინ წარედგინებოდა, როდესაც პროკურატურაში გადაიყვანდნენ:

„პროკურატურის თანამშრომელი ალან ბიაზროვი მაკავებს, მე არ მყავს ადვოკატი, არ აკეთებენ არანაირ განმარტებას რა ხდება ჩემს თავს. მინდა რომ ეს ამბავი გაავრცელოთ“- განუცხადა თამარ მეარაყიშვილმა „ეხო კავკაზა“-ს კორესპონდენტს.

თამარ მეარაყიშვილი საოკუპაციო რეჟიმის პროკურატურის მხრიდან ზეწოლაზე ადრეც საუბრობდა. ის ბოლოს აგვისტოს დასაწყისში დაკითხეს, „ეხო კავკაზა“-სთვის მიცემული კომენტარის გამო. 8 ივნისს კი სამოქალაქო აქტივისტი თვითმხილველების თვალწინ გაიტაცეს და ცხინვალში წაიყვანეს, ის მხოლოდ 24 საათის შემდეგ გაათავისუფლეს.

მეარაყიშვილი რაიონის პროლემურ საკითხებზე და ხელმძღვანელ პირთა ქმედებების შესახებ ფეისბუკის საკუთარ გვერდზე აქტიურად წერს, ის რესპონდენტის სტატუსით თანამშრომლობს რუსულენოვან გამოცემა “ეხო კავკაზასთანაც“. საოკუპაციო რეჟიმის წარმომადგენლების უკმაყოფილებას სწორეს ეს ფაქტი იწვევს.