"სოციალურად დაუცველები მერიისგან 50 ლარიან დამატებით დახმარებას მიიღებენ"- ზაალ უდუმაშვილი

პოლიტიკა - 13:33, 16 Aug, 2017

1376

„ნაციონალური მოძრაობა“ მუშაობის სამწლიან ანგარიშსს საკრებულოს შენობაში წარადგენს. ანგარიშის წარდგენას ენმ-ს თბილისის მერობის კანდიდატი ზაალ უდუმაშვილიც ესწრება. უდუმაშვილმა შეკრებილ საზოგადოებასთან სოციალური დახმარების უსამართლო გადანაწილებაზეც ისაუბრა და აღნიშნა, რომ მძიმე ეკონომიკურ მდგომარეობაში მყოფ ოჯახებს სოციალურ დახმარებას უარგუმენტოდ უხსიან.

„დღეს სოციალური აგენტები თქვენთან სახლებში მიდიან არ იმ მიზნით რომ დაგეხმარონ, არამედ იმ მიზნით, რომ ქულები მოგიმატოთ, რათა დახმარება ვერ მიიღოთ, ეს არის სახელმწიფოს მახინჯი პოლიტიკა სოციალურად დაუცველების მიმართ. ეს დარბაზი სადაც ახლა ვიმყოფებით, თბილისის საკრებულო, სწორედ თქვენი პრობლემების მოსაგვარებლად უნდა მუშაობდეს და არა ვიღაც მოსამართლეებისთვის ქონების ჩუქებაზე და მერიის თანამშრომლებისთვის პრემიებისა და დანამატების გამოწერაზე. ოქტომბრიდან ეს ყველაფერი დასრულდება და შეიცვლება. ყველა სოციალურად დაუცველი, რომლის სარეიტინგო ქულებიც განსაზღვრულია 200 ათას ქულამდე, თბილისის მერიისგან ყველა დამატებით მიიღებს 50 ლარიან დახმარებას, ასეთი არის 166 ათასი ოჯახი. ეს საკმაოდ ძვირი ჯდება, მაგრამ მე უკვე განსაზღვრული მაქვს საიდან მოვიძიებ ამ თანხებს, ეს თანხები დაიზოგება მერიის ჩინოვნიკებისგან.“- განაცხადა უდუმაშვილმა.

ენმ-ს თბილისის მერობის კანდიდატის თქმით ოქტომბერში სიტუაცია შეიცვლება და თბილისის მერიაში მოვა ის ხალხი, ვინც ნამდვილად იზრუნებს ქალაქზე და თანაქალაქელებზე.